વાપી

વાપી ભારત દેશના પશ્ચિમ ભાગમાં આવેલા ગુજરાત રાજ્યના દક્ષિણ ભાગમાં આવેલા વલસાડ જિલ્લામાં આવેલા કુલ ૫ (પાંચ) તાલુકાઓ પૈકીના એક એવા પારડી તાલુકામાં આવેલું એક મહત્વનું, ઔદ્યૌગિકક્ષેત્રે જાણીતું, તેમ જ મુંબઇથી દિલ્હી જતા રાષ્ટ્રીય ધોરી માર્ગ નં. ૮ પર આવેલું નગર છે. આ ઉપરાંત વાપી શહેર અમદાવાદથી મુંબઇ જતા રેલ્વે માર્ગ પરનું વિરાર અને વલસાડ વચ્ચેનું મહત્વનું સ્ટેશન છે. વાપી શહેર ખાતે આવેલી જી.આઇ.ડી.સી. ખુબ જ મોટી ઔદ્યૌગિક વસાહત છે. દમણગંગા નદીના કિનારે આવેલું આ શહેર તેના રસાયનિક ઉધ્યોગો માટે જાણીતું છે. વાપીમાં ઔદ્યોગિક વસાહત અને જોખમી રાસાયણિક કચરાઓના લીધે દુનિયાના નકશામાં ૪ (ચોથા) ક્રમનું પ્રદુષિત શહેર જાહેર થયેલું છે. આ સમસ્યાને ધ્યાનમાં રાખીને સરકાર તથા વાપી ઉદ્યોગથી જોડાયેલા તમામ લોકોએ એક જુથ થઇને વાપીના ઉદ્યોગોના કચરાઓનો નિકાલ કરવાની પહેલ કરી અને તેને અમલમાં મુકાવી.

વાપી નગરમાં પ્રાથમિક શાળા, માધ્યમિક શાળા, મહાવિદ્યાલય જેવી સગવડો ઉપલબ્ધ થયેલ છે. અહીંથી સિલ્વાસા તેમ જ દમણ રાજ્ય ધોરી માર્ગ દ્વારા જઇ શકાય છે. આ ઉપરાંત વાપી અને શામળાજીને જોડતો રાજ્ય ધોરી માર્ગ નં. ૫-અ પણ આ શહેરને રાજ્યની પૂર્વ સરહદે આવેલાં અન્ય સ્થળો સાથે જોડે છે.

વાપી પહોંચવા માટે

મુંબઇથી અમદાવાદ જતા રેલ્વે માર્ગ પર વલસાડ અને વિરાર વચ્ચે વાપી સ્ટેશન આવેલું છે. જો કે આ સ્ટેશન પર તમામ ગાડીઓ થોભતી નથી, આથી વલસાડ ઉતરી ત્યાંથી સડક માર્ગ દ્વારા વાપી પહોંચી શકાય છે.

આ ઉપરાંત રાષ્ટ્રીય ધોરી માર્ગ નં. ૮ શહેર ને ભાગે છે , જેમાં પારડી અને ભીલાડની વચ્ચે વાપી આવતું હોવાથી અહીં સહેલાઇથી પહોંચી શકાય છે. રાજ્ય ધોરી માર્ગ દ્વારા અહીંથી દમણ પણ જઇ શકાય છે.

વાપીથી નજીકનું હવાઇમથક દક્ષિણ દિશામાં મુંબઇ તેમ જ ઉત્તર દિશામાં સુરત ખાતે આવેલું છે.