અલ પચિનો

અલ પચિનો
Pacino in 2016
જન્મ	૨૫ એપ્રિલ ૧૯૪૦  મેનહટન
અભ્યાસ સંસ્થા	Lee Strasberg Theatre and Film Institute Fiorello H. LaGuardia High School Herman Ridder Junior High School Wake Forest Department of Theatre and Dance
વ્યવસાય	ફિલ્મ અભિનેતા, અભિનેતા
પુરસ્કારો	Donostia Award (૧૯૯૬) Theatre World Award (૧૯૬૯) Golden Lion for Lifetime Achievement (૧૯૯૪) Primetime Emmy Award for Outstanding Lead Actor in a Limited or Anthology Series or Movie (Angels in America, 56th Primetime Emmy Awards, ૨૦૦૪) Primetime Emmy Award for Outstanding Lead Actor in a Limited or Anthology Series or Movie (You Don't Know Jack, 62nd Primetime Emmy Awards, ૨૦૧૦) Academy Awards (૧૯૯૨)
સહી

અલ પચિનો નું હુલામણુ નામ ધરાવતા આલ્ફ્રેડો જેમ્સ પચિનો (જન્મ એપ્રિલ ૨૫, ૧૯૪૦), એક અમેરિકન અભિનેતા અને ફિલ્મ નિર્માતા છે. ૨૦મી સદીના સૌથી પ્રભાવશાળી અને મહાન કલાકારોમાંના એક ગણાતા અલ પચિનોએ પાંચ દાયકાથી વધુ લાંબી કારકિર્દીમાં અસંખ્ય યાદગાર ભૂમિકાઓ ભજવી છે. તેઓ અભિનયનો "ટ્રિપલ ક્રાઉન" (ઓસ્કાર, એમી અને ટોની એવોર્ડ) મેળવનારા જૂજ વૈશ્વિક કલાકારોમાં સામેલ છે.

પ્રારંભિક જીવન

આલ્ફ્રેડો જેમ્સ પચિનોનો જન્મ અમેરિકા ના ન્યૂયોર્ક શહેરના મેનહટન વિસ્તારમાં આવેલા ઈસ્ટ હાર્લેમમાં ૨૫ એપ્રિલ, ૧૯૪૦ના રોજ થયો હતો. તેઓ તેમના સિસિલિયન અમેરિકન માતા રોઝ અને પિતા સાલ્વાટોર પચિનોનું એકમાત્ર સંતાન હતા. તેમના પિતા ઇટાલીના સેન ફ્રાટેલોથી આવીને અમેરિકામાં વસ્યા હતા. જ્યારે અલ પચિનો માત્ર બે વર્ષના હતા ત્યારે તેમના માતા-પિતાના છૂટાછેડા થઈ ગયા હતા.

માતા-પિતા અલગ થયા પછી, તેમના માતા તેમને સાઉથ બ્રોન્ક્સ વિસ્તારમાં લઈ ગયા હતા. ત્યાં તેઓ તેમના નાના-નાની કેટ અને જેમ્સ ગેરાર્ડી સાથે રહેતા હતા. તેમના નાના-નાની નાની ઉંમરે ઇટાલીના પ્રખ્યાત કોર્લિયોન ગામમાંથી આવીને અમેરિકામાં વસ્યા હતા. અલગ થયા પછી અલ પચિનોના પિતા કેલિફોર્નિયા જતા રહ્યા હતા, જ્યાં તેમણે વીમા વેચાણકર્તા અને રેસ્ટોરન્ટના માલિક તરીકે કામ શરૂ કર્યું હતું.

જ્યારે અલ પચિનો ત્રણ-ચાર વર્ષના હતા, ત્યારથી જ તેમના માતા તેમને નિયમિત રીતે સિનેમા હોલમાં ફિલ્મો જોવા લઈ જતા હતા. ફિલ્મો જોયા પછી તેઓ મનમાં જ તે પાત્રોના સંવાદો વાગોળવાનું શરૂ કરી દેતા હતા. અલ પચિનોનું હુલામણું નામ સોની બોય હતું, જે તેમની માતાએ તે સમયના પ્રખ્યાત ગાયક અલ જોલ્સનના એક લોકપ્રિય ગીત પરથી રાખ્યું હતું, જે તેઓ અવારનવાર અલ પચિનો માટે ગાતા હતા.

પચિનો એ હર્મન રિડર જુનિયર હાઈસ્કૂલમાં અભ્યાસ કર્યો હતો, પરંતુ ટૂંક સમયમાં જ તેમણે અંગ્રેજી સિવાયના મોટાભાગના વિષયોના વર્ગો છોડી દીધા હતા. તેમના જુનિયર હાઈસ્કૂલના શિક્ષિકા બ્લેન્ચ રોથસ્ટીને નાની ઉંમરે જ તેમની અભિનય ક્ષમતા ઓળખી લીધી હતી. તેમણે અલ પચિનોને શાળાના નાટકોમાં ભૂમિકાઓ આપી અને વિદ્યાર્થીઓની સભાઓમાં બાઇબલના પાઠ વાંચવાનું કામ સોંપ્યું. તે શિક્ષિકાએ તેમના પરિવારના એપાર્ટમેન્ટની મુલાકાત લીધી અને તેમની નાનીને ખાસ કહ્યું કે આ બાળક આ જ કામ માટે બન્યો છે, જેને અલ પચિનો પોતાના જીવનનો સૌથી મોટો વળાંક માને છે. ત્યારબાદ ઓડિશન આપીને તેમણે હાઈસ્કૂલ ઓફ પરફોર્મિંગ આર્ટ્સમાં પ્રવેશ મેળવ્યો. જોકે તેમની માતા તેમના આ નિર્ણયથી અસંમત હતા, કારણ કે તેઓ માનતા હતા કે ગરીબ લોકો અભિનય ન કરે. આ બાબતે ઘરમાં ઝઘડો થતાં તેમણે ઘર છોડી દીધું હતું.

પચિનો એ પોતાના સપના પૂરા કરવા અને ખર્ચ ઉઠાવવા માટે સંદેશવાહક, હોટેલમાં વાસણ સાફ કરવાના સહાયક, સફાઈ કામદાર, ટેલિફોન ઓપરેટર અને ટપાલ ક્લાર્ક જેવી ઓછી આવક વાળી નોકરીઓ કરી હતી. આ સમય દરમિયાન તેઓ ન્યૂયોર્કના અંડરગ્રાઉન્ડ થિયેટરોમાં બેઝમેન્ટ નાટકોમાં અભિનય કરતા હતા. કિશોરાવસ્થામાં તેમણે એક્ટર્સ સ્ટુડિયો નામની સંસ્થામાં જોડાવાનો પ્રયાસ કર્યો પરંતુ તેઓ રિજેક્ટ થયા. ત્યારબાદ તેઓ એચબી સ્ટુડિયોમાં જોડાયા, જ્યાં તેમની મુલાકાત અભિનયના શિક્ષક ચાર્લી લોટન સાથે થઈ, જેઓ પાછળથી તેમના માર્ગદર્શક અને શ્રેષ્ઠ મિત્ર બન્યા. આ સ્ટુડિયોના હોલ અને ડાન્સ રૂમ સાફ કરવાના બદલામાં સંસ્થાએ તેમને મફતમાં ક્લાસ કરવાની મંજૂરી આપી હતી. રાત્રિના સમયે અલ પચિનો શેરીઓમાં ફરતા ફરતા શેક્સપિયરના સંવાદોની પ્રેક્ટિસ કરતા હતા. આ સમયગાળામાં તેઓ ઘણીવાર બેરોજગાર અથવા બેઘર રહ્યા હતા, અને ક્યારેક શેરીઓમાં, થિયેટરોમાં અથવા મિત્રના ઘરે સૂઈ જતા હતા.

વર્ષ ૧૯૬૨માં પચિનોના માતાનું ત્રેતાલીસ વર્ષની નાની ઉંમરે અવસાન થયું હતું. તેના પછીના જ વર્ષે તેમના નાનાનું પણ અવસાન થયું. અલ પચિનો આ સમયને પોતાના જીવનનો સૌથી મુશ્કેલ તબક્કો માને છે. તેમણે જણાવ્યું હતું કે તેઓ તે સમયે બાવીસ વર્ષના હતા અને તેમના જીવનના સૌથી પ્રભાવશાળી બે લોકો ચાલ્યા ગયા હતા, જેના કારણે તેઓ સંપૂર્ણપણે ભાંગી પડ્યા હતા.

એચબી સ્ટુડિયોમાં ચાર વર્ષ વિતાવ્યા પછી, અલ પચિનોએ એક્ટર્સ સ્ટુડિયો માટે સફળતાપૂર્વક ઓડિશન આપ્યું. ત્યાં તેમણે અભિનયના પ્રખ્યાત કોચ લી સ્ટ્રાસબર્ગ હેઠળ પદ્ધતિસરના અભિનયનો અભ્યાસ કર્યો. આ જ લી સ્ટ્રાસબર્ગ પાછળથી અલ પચિનો સાથે ધ ગોડફાધર ભાગ બે ફિલ્મમાં પણ જોવા મળ્યા હતા. પાછળથી આપેલા ઇન્ટરવ્યુમાં તેમણે સ્ટ્રાસબર્ગ અને આ સંસ્થાની તેમના જીવન પર પડેલી અસર વિશે વાત કરી હતી કે એક્ટર્સ સ્ટુડિયોનું તેમના જીવનમાં ખૂબ મોટું સ્થાન છે અને લી સ્ટ્રાસબર્ગને જેટલું સન્માન મળવું જોઈતું હતું તેટલું નથી મળ્યું. ચાર્લી લોટન પછી આ સંસ્થાએ જ તેમની કારકિર્દીને એક નવી દિશા આપી હતી, જેના કારણે તેઓ અન્ય નાની-મોટી નોકરીઓ છોડીને સંપૂર્ણપણે અભિનય તરફ વળી શક્યા હતા. તેમણે વધુમાં જણાવ્યું હતું કે લી સ્ટ્રાસબર્ગ સાથે કામ કરવું ખૂબ જ ઉત્સાહજનક હતું કારણ કે તેઓ જ્યારે કોઈ દ્રશ્ય કે લોકો વિશે વાત કરતા ત્યારે એટલા રસપ્રદ લાગતા કે બસ તેમને સાંભળતા જ રહેવાનું મન થાય. તેઓ અભિનેતાઓને ખૂબ પ્રેમ કરતા અને અભિનયની અદ્ભુત સમજ ધરાવતા હતા.

અંગત જીવન

સંબંધો અને બાળકો

પચિનોનો તેમની 'ધ ગોડફાધર' ફિલ્મના સહ-અભિનેત્રી ડાયેન કીટન સાથે લાંબો સંબંધ રહ્યો હતો. તેમનો આ ઉતાર-ચઢાવવાળો સંબંધ 'ધ ગોડફાધર પાર્ટ ૩' ના શૂટિંગ પછી પૂરો થયો હતો. આ સિવાય તેઓ જીલ ક્લેબર્ગ, ટ્યુઝડે વેલ્ડ, માર્થે કેલર, વેરુસ્કા વોન લેહન્દોર્ફ, કેથલીન ક્વિનલાન, લિન્ડાલ હોબ્સ અને પેનેલોપ એન મિલર સાથે પણ સંબંધોમાં રહ્યા હતા. પચિનોનો આર્જેન્ટિનાની અભિનેત્રી લ્યુસિલા પોલાક સાથે ૨૦૦૮ થી ૨૦૧૮ સુધી ૧૦ વર્ષ લાંબો સંબંધ રહ્યો હતો.

પચિનોને ચાર બાળકો છે. તેમની સૌથી મોટી દીકરી જૂલી મેરીનો જન્મ ૧૬ ઓક્ટોબર ૧૯૮૯ના રોજ થયો હતો, જે તેમની અને એક્ટિંગ કોચ જેન ટેરન્ટની દીકરી છે. આ સિવાય ૨૫ જાન્યુઆરી ૨૦૦૧ના રોજ આઈવીએફ પદ્ધતિ દ્વારા તેમને બે જોડિયા બાળકો થયા હતા, જેમની માતા અભિનેત્રી બેવર્લી ડી એન્જેલો છે, જેમની સાથે પચિનો ૧૯૯૭ થી ૨૦૦૩ સુધી સંબંધમાં રહ્યા હતા. ત્યારબાદ ૨૦૨૨ થી ૨૦૨૪ દરમિયાન ફિલ્મ નિર્માતા નૂર અલ્ફલ્લાહ સાથેના સંબંધોથી ૧૫ જૂન ૨૦૨૩ના રોજ તેમને એક દીકરો થયો હતો.૮૩ વર્ષની ઉંમરે પચિનો દુનિયાના સૌથી મોટી ઉંમરે પિતા બનનારા વ્યક્તિઓમાંથી એક બન્યા છે, કોરોના લોકડાઉન બાદ ૨૦૨૨માં શરૂ થયેલો આ સંબંધ ઓક્ટોબર ૨૦૨૪માં સત્તાવાર રીતે પૂરો થયો હતો અને બંને અલગ થઈ ગયા હતા, પચીનો એ ક્યારેય લગ્ન કર્યા નથી.

કારકિર્દી

૧૯૬૭–૧૯૭૧: થિયેટર ભૂમિકાઓ અને ફિલ્મ સફરની શરૂઆત

અલ પચિનો ૧૯૭૭માં ધ બેઝિક ટ્રેનિંગ ઑફ પાવ્લો હમેલ નાટકમાં અભિનય કરતા.

૧૯૬૭માં અલ પચિનોએ બોસ્ટનના ચાર્લ્સ પ્લેહાઉસમાં અવેક એન્ડ સિંગ નાટકથી વ્યાવસાયિક રંગમંચ કારકિર્દીની શરૂઆત કરી. ત્યારબાદ અમેરિકા હુર્રા નાટકમાં કામ દરમિયાન તેમની મુલાકાત અભિનેત્રી જીલ ક્લેબર્ગ સાથે થઈ, બંને વચ્ચે પાંચ વર્ષ સુધી પ્રેમસંબંધ રહ્યો, અને ત્યારબાદ તેઓ ન્યૂયોર્ક શહેરમાં પાછા ફર્યા હતા.

વર્ષ ૧૯૬૮માં પચિનોએ એસ્ટોર પ્લેસ થિયેટરમાં ઇઝરાયેલ હોરોવિટ્ઝના ધ ઇન્ડિયન વોન્ટ્સ ધ બ્રોન્ક્સ નામના નાટકમાં મર્ફ નામના શેરી ગુંડાની મુખ્ય ભૂમિકા ભજવી હતી. આ નાટક ૧૭ જાન્યુઆરી, ૧૯૬૮ના રોજ શરૂ થયું હતું અને તેના કુલ એકસો સિત્યોતેર શો થયા હતા. આ નાટકની સાથે જ હોરોવિટ્ઝનું બીજું નાટક ઈટ્સ કોલ્ડ ધ સુગર પ્લમ પણ દર્શાવવામાં આવતું હતું, જેમાં જીલ ક્લેબર્ગ મુખ્ય ભૂમિકામાં હતી. આ નાટકમાં શાનદાર અભિનય માટે પચિનોને શ્રેષ્ઠ અભિનેતાનો ઓબી એવોર્ડ મળ્યો હતો, જ્યારે જોન કાઝલેને શ્રેષ્ઠ સહાયક અભિનેતાનો એવોર્ડ મળ્યો હતો. માર્ટિન બ્રેગમેને આ નાટક જોયું અને તેઓ પચિનોના મેનેજર બન્યા હતા. આ ભાગીદારી આવનારા વર્ષોમાં ખૂબ જ સફળ સાબિત થઈ, કારણ કે બ્રેગમેને જ પચિનોને ધ ગોડફાધર, સેર્પીકો અને ડોગ ડે આફ્ટરનૂન જેવી મહાન ફિલ્મો કરવા માટે પ્રોત્સાહિત કર્યા હતા. પોતાની સ્ટેજ કારકિર્દી વિશે પચિનોએ જણાવ્યું હતું કે માર્ટિન બ્રેગમેને જ મારી શોધ કરી હતી જ્યારે હું પચીસ-છવ્વીસ વર્ષનો હતો અને તેઓ મારા મેનેજર બન્યા હતા. હું આજે જે પણ સ્થાને છું તે માર્ટીના કારણે જ છું અને હું ખરેખર તેમનો ઋણી છું.

૨૫ ફેબ્રુઆરી, ૧૯૬૯ના રોજ પચિનોએ બેલાસ્કો થિયેટર ખાતે ડોન પીટરસનના ડઝ અ ટાઈગર વેર અ નેકટાઈ નામના નાટકથી બ્રોડવે થિયેટરમાં પ્રવેશ કર્યો હતો. આ નાટક ઓગણચાળીસ શો પછી ૨૯ માર્ચ, ૧૯૬૯ના રોજ બંધ થઈ ગયું હતું, પરંતુ પચિનોના અભિનયના ખૂબ જ વખાણ થયા હતા અને ૨૦ એપ્રિલ, ૧૯૬૯ના રોજ તેમને આ ભૂમિકા માટે પ્રતિષ્ઠિત ટોની એવોર્ડ મળ્યો હતો. પચિનોએ ૧૯૭૦ના દાયકામાં પણ સ્ટેજ પર અભિનય ચાલુ રાખ્યો હતો અને ધ બેઝિક ટ્રેનિંગ ઓફ પાવલો હમેલ નામના નાટક માટે પોતાનો બીજો ટોની એવોર્ડ જીત્યો હતો. આ સિવાય તેમણે રિચાર્ડ ધ થર્ડ નામના નાટકમાં મુખ્ય શીર્ષક ભૂમિકા ભજવી હતી. ૧૯૮૦ના દાયકા મા ડેવિડ મેમેટના અમેરિકન બફેલો નામના નાટકમાં દેખાયા પછી પચિનોએ ફરીથી સ્ટેજ પર મોટી સફળતા મેળવી હતી, જેના માટે તેમને ડ્રામા ડેસ્ક એવોર્ડ માટે નામાંકિત કરવામાં આવ્યા હતા. વર્ષ ૧૯૯૦ પછી પચીનો સ્ટેજ કાર્યોમાં યુજેન ઓ નીલના હ્યુગી, ઓસ્કાર વાઈલ્ડના સાલોમે અને વર્ષ ૨૦૦૫માં લાઈલ કેસ્લરના ઓર્ફન્સ નામના નાટકોના પુનઃપ્રસારણનો સમાવેશ થાય છે. એક્ટર્સ સ્ટુડિયોમાં અભ્યાસ કરતી વખતે પચીનોને સમજાયું હતું કે તેમની પાસે અભિનયની એક અદ્ભુત ભેટ છે અને તેમને આ કામમાં ખૂબ આનંદ આવતો હતો, જોકે તેમના શરૂઆતના કામો આર્થિક રીતે બહુ ફાયદાકારક નહોતા.

સ્ટેજ પર સફળતા મેળવ્યા પછી પચિનોએ વર્ષ ૧૯૬૯માં પેટ્ટી ડ્યુક અભિનીત એક સ્વતંત્ર ફિલ્મ મી, નેટલીમાં ટૂંકી ભૂમિકા ભજવીને ફિલ્મી દુનિયામાં પ્રવેશ કર્યો હતો. વર્ષ ૧૯૭૦માં પચિનોએ ક્રિએટિવ મેનેજમેન્ટ એસોસિએટ્સ નામની ટેલેન્ટ એજન્સી સાથે કરાર કર્યા હતા. ત્યારબાદ વર્ષ ૧૯૭૧માં આવેલી ફિલ્મ ધ પેનિક ઇન નીડલ પાર્કમાં એક હેરોઈનના બંધાણી યુવકની મુખ્ય ભૂમિકા ભજવીને તેમણે ફીચર ફિલ્મમાં મુખ્ય અભિનેતા તરીકે સત્તાવાર શરૂઆત કરી હતી.

૧૯૭૨–૧૯૮૩: વૈશ્વિક લોકપ્રિયતા અને સફળતા

વર્ષ ૧૯૭૨ની આસપાસ જેમ્સ કાન સાથે અલ પચિનો

ડિરેક્ટર ફ્રાન્સિસ ફોર્ડ કોપોલાએ પચિનોને મારીયો પુઝો ની ૧૯૬૯ માં પ્રકાશિત થયેલી સુપર હિટ માફિયા નવલકથા પર આધારિત ફિલ્મ ધ ગોડફાધર માં માઈકલ કોર્લિયોનની મુખ્ય ભૂમિકા માટે પસંદ કર્યા હતા, જે વર્ષ ૧૯૭૨ રિલીઝ થઈ હતી. જોકે આ ભૂમિકા મેળવવા માટે જેક નિકોલસન, રોબર્ટ રેડફોર્ડ, વોરેન બીટી અને તે સમયે ખૂબ જ ઓછા જાણીતા એવા રોબર્ટ ડી નિરોએ પણ પ્રયાસો કર્યા હતા. તેમ છતાં દિગ્દર્શક ફ્રાન્સિસ ફોર્ડ કોપોલાએ અલ પચિનોની જ પસંદગી કરી હતી; કારણ કે પચિનો પોતે ઇટાલિયન મૂળના હતા અને તેમની એકટિંગ માં એક ખાસ તીવ્રતા હતી જે કોપોલાને 'માઇકલ કોર્લિયોની'ના પાત્ર માટે જોઈતી હતી.

શરૂઆતમાં પેરામાઉન્ટ પિક્ચર્સ ફિલ્મ સ્ટુડિયોના વરિષ્ઠ અધિકારીઓ આ પસંદગીથી નારાજ થયા હતા, કારણ કે તેઓ આ ભૂમિકા માટે કોઈ વધુ પ્રખ્યાત અભિનેતાને લેવા માંગતા હતા. જોકે, ફિલ્મમાં પચીનોના પ્રખ્યાત 'રેસ્ટોરન્ટ શૂટઆઉટ દ્રશ્ય'ના શૂટિંગ પછી તેઓ માની ગયા હતા.

આ ફિલ્મ બોક્સ ઓફિસ પર તમામ રેકોર્ડ તોડીને ઓલ-ટાઇમ બ્લોકબસ્ટર સાબિત થઈ અને તે વર્ષની સૌથી વધુ કમાણી કરનારી ફિલ્મ બની. આ ફિલ્મમાં પચિનોના અદ્ભુત અભિનયને કારણે તેમને ઓસ્કાર એવોર્ડનું નામાંકન મળ્યું હતું. તેમના આ પરફોર્મન્સને ફિલ્મ જગતમાં એક અત્યંત તીવ્ર અને પ્રભાવશાળી એક્ટિંગના સૌથી શ્રેષ્ઠ ઉદાહરણ તરીકે જોવામાં આવે છે. આ સાથે જ, માઇકલ કોર્લિયોનીનું આ પાત્ર આજે પણ સિનેમાના ઇતિહાસમાં એક અત્યંત પ્રખ્યાત અને આઇકોનિક પાત્ર માનવામાં આવે છે.

લાંબા સમય સુધી એવી અફવાઓ હતી કે પચિનોએ તે વર્ષના ઓસ્કાર એવોર્ડ સમારોહનો બહિષ્કાર કર્યો હતો. અફવા મુજબ તેઓ શ્રેષ્ઠ સહાયક અભિનેતાની શ્રેણીમાં નામાંકિત થવાથી નારાજ હતા, કારણ કે ફિલ્મમાં મુખ્ય અભિનેતાનો ઓસ્કાર જીતનાર સહ-કલાકાર માર્લોન બ્રાન્ડો કરતાં અલ પચિનોનો સ્ક્રીન પર દેખાવાનો સમય વધુ હતો. જોકે, વર્ષ ૨૦૨૪માં પ્રકાશિત થયેલી પોતાની આત્મકથામાં અલ પચિનોએ આ અફવાઓનું સંપૂર્ણ ખંડન કર્યું છે. તેમણે સ્પષ્ટતા કરી છે કે તે સમયે અચાનક મળેલી વૈશ્વિક લોકપ્રિયતા અને પ્રખ્યાતિના કારણે તેઓ ખૂબ ડરી ગયા હતા અને માનસિક રીતે સંઘર્ષ કરી રહ્યા હતા. આ અતિશય ભયના કારણે અને તે જ સમયે બોસ્ટનમાં થિયેટરના કામમાં વ્યસ્ત હોવાને લીધે તેઓ તે ઓસ્કાર સમારોહમાં હાજર રહી શક્યા નહોતા.

૧૯૭૩માં, પચિનોએ જીન હેકમેન સાથે સ્કેરક્રો ફિલ્મમાં કામ કર્યું હતું, જેને કાન્સ ફિલ્મ ફેસ્ટિવલમાં પ્રતિષ્ઠિત પામ ડી ઓર એવોર્ડ મળ્યો હતો. એ જ વર્ષે, ન્યૂ યોર્ક સિટીના પોલીસ ઓફિસર ફ્રેન્ક સેર્પિકોની સાચી વાર્તા પર આધારિત સેર્પિકો ફિલ્મમાં શાનદાર એક્ટિંગ કરવા બદલ પચીનોને બેસ્ટ એક્ટરના ઓસ્કાર એવોર્ડ માટે નોમિનેશન મળ્યું હતું. આ ફિલ્મમાં તેમણે સાથી પોલીસ અધિકારીઓનો ભ્રષ્ટાચાર ખુલ્લો પાડવા માટે અંડરકવર ઓપરેશન કર્યું હતું.

૧૯૭૩માં સેર્પિકો ફિલ્મના પાત્રમાં પચીનો

ત્યારબાદ ૧૯૭૪માં, ઓલ-ટાઇમ બ્લોકબસ્ટર ફિલ્મ 'ધ ગોડફાધર'ની સિક્વલ મૂવીમાં પચિનોએ ફરી એકવાર માઇકલ કોર્લિયોનીનું પાત્ર ભજવ્યું હતું. આ ફિલ્મ બોક્સ ઓફિસ પર સુપર હિટ રહી અને સાથે બેસ્ટ પિક્ચરનો ઓસ્કાર જીતનારી ઇતિહાસની પહેલી સિક્વલ બની હતી. આ રોલ માટે પચીનોને ત્રીજી વખત ઓસ્કાર નોમિનેશન મળ્યું હતું, જે માઇકલ કોર્લિયોનીના પાત્ર માટે તેમનું લીડ કેટેગરીમાં બીજું નોમિનેશન હતું. પ્રખ્યાત મેગેઝિન ન્યૂઝવીકે ધ ગોડફાધર પાર્ટ ૨ માં તેમના પરફોર્મન્સને સિનેમાના ઇતિહાસમાં કોઈ વ્યક્તિના હૃદયના કઠોર થવાની પ્રક્રિયાનું સૌથી શ્રેષ્ઠ પ્રદર્શન ગણાવ્યું હતું.

૧૯૭૫માં, પચિનોને બેંક લૂંટારા જોન વોજટોવિચની સાચી વાર્તા પર આધારિત 'ડોગ ડે આફ્ટરનૂન' ફિલ્મથી વધુ એક મોટી બોક્સ ઓફિસ પર બ્લોકબસ્ટર સફળતા મળી, આ ફિલ્મનું નિર્દેશન સિડની લુમેટ દ્વારા કરવામાં આવ્યું હતું, જેમણે થોડા વર્ષો પહેલા 'સેર્પિકો' ફિલ્મમાં પણ તેમની સાથે કામ કર્યું હતું. આ ફિલ્મ માટે પચિનોને ફરી એકવાર ઓસ્કારમાં બેસ્ટ એક્ટરનું નામાંકન મળ્યું હતું.

૧૯૭૫માં આવેલી ડોગ ડે આફ્ટરનૂન ફિલ્મના એક દ્રશ્યમાં પચિનો

ત્યારબાદ ૧૯૭૭માં, સિડની પોલેક દ્વારા નિર્દેશિત 'બોબી ડીયરફિલ્ડ' ફિલ્મમાં પચિનોએ એક રેસ-કાર ડ્રાઇવરની મુખ્ય ભૂમિકા ભજવી હતી, આ ફિલ્મ બોક્સ ઓફિસ પર ફ્લૉપ થઈ હતી, પરંતું આ શાનદાર રોલ માટે તેમને ગોલ્ડન ગ્લોબ એવોર્ડ્સમાં બેસ્ટ એક્ટરનું નામાંકન મળ્યું હતું. તેમની આના પછીની ફિલ્મ કોર્ટરૂમ ડ્રામા આધારિત 'એન્ડ જસ્ટિસ ફોર ઓલ' હતી. જે સુપર હિટ બની સાથે આ ફિલ્મમાં પચિનોની અદ્ભુત એક્ટિંગ રેન્જના ફિલ્મ વિવેચકોએ ખૂબ વખાણ કર્યા અને તેમને ચોથી વખત બેસ્ટ એક્ટરના ઓસ્કાર એવોર્ડ માટે નોમિનેશન મળ્યું. જોકે, તે વર્ષે આ એવોર્ડ 'ક્રેમર વર્સિસ ક્રેમર' ફિલ્મ માટે ડસ્ટિન હોફમેનને મળ્યો હતો, રસપ્રદ વાત એ છે કે આ ફિલ્મની ઓફર પહેલા પચિનોને થઈ હતી પણ તેમણે આ રોલ કરવાની ના પાડી દીધી હતી.

૧૯૭૦ના દાયકા દરમિયાન, પચિનોને કુલ પાંચ ઓસ્કાર નામાંકન મળ્યા હતા, જેમાં સેર્પિકો, ધ ગોડફાધર પાર્ટ ૨, ડોગ ડે આફ્ટરનૂન અને એન્ડ જસ્ટિસ ફોર ઓલ ફિલ્મો માટે બેસ્ટ એક્ટરના ચાર નામાંકન સામેલ હતા.

૧૯૮૦ના દાયકાની શરૂઆતમાં પચિનોની કારકિર્દીમાં થોડો ઘટાડો જોવા મળ્યો હતો. ન્યૂ યોર્કના ગે સમુદાયના વિરોધનો સામનો કરનારી તેમની વિવાદાસ્પદ ફિલ્મ 'ક્રૂઝિંગ' અને કોમેડી-ડ્રામા ફિલ્મ 'ઓથર! ઓથર!' બોક્સ ઓફિસ પર ખાસ સફળ ન રહી અને ફિલ્મ વિવેચકોએ પણ તેના નકારાત્મક રિવ્યૂ આપ્યા હતા. જોકે, ૧૯૮૩માં બ્રાયન ડી પાલ્મા દ્વારા નિર્દેશિત ગેંગસ્ટર ક્રાઇમ એક્શન ડ્રામા ફિલ્મ 'સ્કારફેસ'માં તેમનું પરફોર્મન્સ તેમની કારકિર્દીનું સૌથી મોટું હાઇલાઇટ અને યાદગાર પાત્ર સાબિત થયું. શરૂઆતમાં આ ફિલ્મમાં બતાવેલી અતિશય હિંસાના કારણે વિવેચકોએ તેની આકરી ટીકા કરી હતી, પરંતુ સમય જતાં આ ફિલ્મને સિનેમા જગતમાં ભારે પ્રશંસા મળી. આ ફિલ્મે બોક્સ ઓફિસ પર ઘણું સારું પ્રદર્શન કર્યું,તેમજ ફિલ્મમાં ક્યુબન ડ્રગ લોર્ડ 'ટોની મોન્ટાના' નો દમદાર રોલ ભજવવા બદલ પચિનોને ગોલ્ડન ગ્લોબ એવોર્ડનું નામાંકન મળ્યું હતું. પચિનોએ ભજવેલું ટોની મોન્ટાનાનું આ પાત્ર આજે પણ સિનેમાના ઇતિહાસમાં એક આઇકોનિક ગેંગસ્ટર પાત્ર તરીકે જોવામાં આવે છે.

૧૯૮૪–૧૯૯૯: ૪ વર્ષનો બ્રેક અને જબરદસ્ત વાપસી

અમેરિકન ક્રાંતિ દરમિયાન એક શિકારીની વાર્તા પર આધારિત તેમની ૧૯૮૫ની ફિલ્મ 'રેવલ્યુશન' કમાણી અને વિવેચકો બંને દ્રષ્ટિએ નિષ્ફળ રહી હતી. પચિનોએ આ નિષ્ફળતા માટે ફિલ્મના ઉતાવળિયા પ્રોડક્શનને જવાબદાર ગણાવ્યું હતું, જેના કારણે તેમણે ફિલ્મોમાંથી ચાર વર્ષનો બ્રેક લીધો હતો. આ સમય દરમિયાન પચિનો ફરી રંગમંચ તરફ વળ્યા. તેમણે 'ક્રિસ્ટલ ક્લિયર', 'નેશનલ એન્થમ્સ' અને અન્ય નાટકોના વર્કશોપ પ્રોડક્શન્સ તૈયાર કર્યા; તેમજ ૧૯૮૮માં પ્રોડ્યુસર જોસેફ પેપના 'ન્યૂ યોર્ક શેક્સપિયર ફેસ્ટિવલ'માં 'જુલિયસ સીઝર' નાટકમાં પણ અભિનય કર્યો.

ફિલ્મોમાંથી લીધેલા આ બ્રેક વિશે પચિનોએ જણાવ્યું હતું કે: "મને યાદ છે જ્યારે ૧૯૭૪-૭૫માં બધું બરાબર ચાલી રહ્યું હતું, ત્યારે હું સ્ટેજ પર 'ધ રેઝિસ્ટિબલ રાઇઝ ઓફ આર્ટુરો ઉઇ' નાટક કરી રહ્યો હતો. તે સમયે મેં ક્યાંક વાંચ્યું કે હું સ્ટેજ પર એટલે પાછો ફર્યો છું કારણ કે મારું ફિલ્મી કરિયર ડૂબી રહ્યું છે! થિયેટર પ્રત્યે લોકોની આવી નકારાત્મક વિચારસરણી રહી છે, જે કમનસીબ છે."

પચિનોએ ૧૯૮૯માં 'સી ઓફ લવ' ફિલ્મથી ફરી મોટા પડદા પર વાપસી કરી, જેમાં તેમણે એક એવા ડિટેક્ટિવની ભૂમિકા ભજવી હતી જે અખબારની સિંગલ્સ કોલમ દ્વારા શિકાર શોધતા સિરિયલ કિલરની શોધ કરે છે. આ ફિલ્મને વિવેચકો તરફથી ખૂબ જ સારા રિવ્યૂઝ મળ્યા હતા, અને બોક્સ ઓફિસ પર એક મોટી સુપરહિટ ફિલ્મ સાબિત થઈ હતી.

૧૯૯૦માં આવેલી 'ડિક ટ્રેસી' ફિલ્મ પણ બોક્સ ઓફિસ પર વ્યાવસાયિક રીતે સફળ રહી હતી. આ ફિલ્મમાં 'બિગ બોય કેપ્રિસ'ની ભૂમિકા ભજવવા માટે પચિનોને એકેડેમી એવોર્ડ એટલે કે ઓસ્કારનું નોમિનેશન મળ્યું હતું. પ્રખ્યાત ફિલ્મ વિવેચક રોજર એબર્ટે પચિનોના વખાણ કરતા તેમને આખી ફિલ્મમાં આકર્ષણનું કેન્દ્ર ગણાવ્યા હતા.આ જ વર્ષમાં આગળ જતાં, તેમણે ગોડફાધર સિરીઝના ત્રીજા ભાગ 'ધ ગોડફાધર ૩' માં તેમના સૌથી પ્રખ્યાત પાત્રોમાંના એક, માઈકલ કોર્લિયોન તરીકે પુનરાગમન કર્યું હતું. જોકે આ ફિલ્મ આર્થિક રીતે સફળ હિટ સાબિત થઈ હતી, પરંતુ તે તેના અગાઉના બંને ભાગો જેટલી મોટી સફળતા મેળવી શકી નહોતી, અને પચીનોના પરિપક્વ અને લાગણીસભર અભિનયના વિવેચકો દ્વારા વ્યાપક વખાણ કરવામાં આવ્યા હતા. આ શાનદાર અભિનય માટે તેમને મોશન પિક્ચર ડ્રામા શ્રેણીમાં 'બેસ્ટ એક્ટર' (શ્રેષ્ઠ અભિનેતા) તરીકે પ્રતિષ્ઠિત ગોલ્ડન ગ્લોબ એવોર્ડનું નોમિનેશન પણ મળ્યું હતું.

૧૯૯૧માં પચિનોએ 'ફ્રેન્કી અને જોની' ફિલ્મમાં મિશેલ ફીફર સાથે અભિનય કર્યો, જેમણે અગાઉ 'સ્કારફેસ' ફિલ્મમાં પણ તેમની સાથે કામ કર્યું હતું. આ ફિલ્મમાં પચિનોએ જેલમાંથી મુક્ત થયેલા એક રસોઈયાની ભૂમિકા ભજવી હતી, જે પોતાની સાથે રેસ્ટોરન્ટમાં કામ કરતી એક વેઈટ્રેસ સાથે સંબંધની શરૂઆત કરે છે. આ ફિલ્મ ટેરેન્સ મેકનેલીના ૧૯૮૭ના પ્રખ્યાત નાટક પરથી બનાવવામાં આવી હતી. વિવેચકો તરફથી આ ફિલ્મને મિશ્ર પ્રતિસાદ મળ્યો હતો અને બોક્સ ઓફિસ પર આ ફિલ્મ એવરેજ સાબિત થઈ હતી, જોકે પચિનોએ પાછળથી જણાવ્યું હતું કે તેમને આ પાત્ર ભજવવાની ખૂબ મજા આવી હતી. ધ ન્યૂ યોર્ક ટાઈમ્સના વિવેચક જેનેટ મેસ્લિને પચિનોના વખાણ કરતા લખ્યું હતું કે, પચિનો આટલા સરળ અને આકર્ષક અગાઉ ક્યારેય દેખાયા નથી અને મિશેલ સાથેના તેમના દ્રશ્યો ખૂબ જ સચોટ અને પ્રમાણિક છે.

૧૯૯૨માં આવેલી માર્ટિન બ્રેસ્ટની ફિલ્મ 'સેન્ટ ઓફ અ વુમન'માં એક ગુસ્સાવાળા અને અંધ યુએસ આર્મી લેફ્ટનન્ટ કર્નલ ફ્રેન્ક સ્લેડની યાદગાર ભૂમિકા ભજવવા માટે પચિનોને તેના પછીના વર્ષે શ્રેષ્ઠ અભિનેતાનો એકેડેમી એવોર્ડ એટલે કે ઓસ્કાર મળ્યો હતો. આ જ વર્ષે તેમને 'ગ્લેનગેરી ગ્લેન રોસ' ફિલ્મ માટે શ્રેષ્ઠ સહાયક અભિનેતા તરીકે પણ નોમિનેશન મળ્યું હતું. આ સાથે જ પચિનો એક જ વર્ષમાં બે અલગ-અલગ ફિલ્મો માટે બે એક્ટિંગ નોમિનેશન મેળવનારા અને મુખ્ય ભૂમિકા માટે ઓસ્કાર જીતનારા ઇતિહાસના પ્રથમ પુરુષ અભિનેતા બન્યા હતા.

૧૯૯૩માં પચિનોએ ગુનાહિત ડ્રામા ફિલ્મ 'કાર્લિટોઝ વે' માં સીન પેન સાથે અભિનય કર્યો હતો. આ ફિલ્મ ન્યૂયોર્ક સ્ટેટ સુપ્રીમ કોર્ટના જજ એડવિન ટોરેસ દ્વારા લખાયેલી નવલકથાઓ 'કાર્લિટોઝ વે' (૧૯૭૫) અને 'આફ્ટર અવર્સ' (૧૯૭૯) પર આધારિત હતી. આ ફિલ્મનું દિગ્દર્શન જાણીતા ડાયરેક્ટર બ્રાયન ડી પાલ્માએ કર્યું, જેમની સાથે પચિનોએ અગાઉ ૧૯૮૩ની તેમની હિટ, આઇકોનિક ક્લ્ટ ક્લાસિક ફિલ્મ 'સ્કારફેસ' માં કામ કર્યું હતું. આ ફિલ્મમાં પચિનોએ કાર્લિટો બ્રિગાન્તે નામના એક એવા ગેંગસ્ટરની ભૂમિકા ભજવી હતી જે પોતાના ભ્રષ્ટ વકીલની મદદથી જેલમાંથી મુક્ત થાય છે અને હવે સુધરી જવાની પ્રતિજ્ઞા લે છે. રિલીઝ સમયે બોક્સ ઓફિસ પર આ ફિલ્મ સરેરાશ સફળ રહી હતી, અને તેને મિશ્ર પ્રતિભાવો મળ્યા હતા, પરંતુ પાછળથી તે સિનેમા જગતમાં એક 'કલ્ટ ક્લાસિક' ગેંગસ્ટર ફિલ્મ તરીકે પ્રખ્યાત થઈ હતી.

ત્યારબાદ ૧૯૯૫માં પચિનોએ માઈકલ મેનની પ્રખ્યાત એક્શન ક્રાઈમ થ્રિલર ફિલ્મ 'હીટ' માં કામ કર્યું, જેમાં તેઓ અને રોબર્ટ ડી નિરો પ્રથમ વખત મોટા પડદા પર એકસાથે જોવા મળ્યા હતા (જોકે આ બંને કલાકારો અગાઉ 'ધ ગોડફાધર ભાગ ૨' માં પણ હતા, પરંતુ તેમાં બંનેનો એક પણ સીન સાથે નહોતો). આ ફિલ્મને વિવેચકોએ ખૂબ વખાણી હતી અને તે બોક્સ ઓફિસ પર સુપરહીટ ફિલ્મ સાબિત થઈ હતી. આજે પણ આ ફિલ્મને સિનેમા જગતની એક માસ્ટરપીસ સિનેમેટિક અને ઇતિહાસની સૌથી પ્રભાવશાળી 'હીસ્ટ' ફિલ્મોમાંની એક ગણવામાં આવે છે.૧૯૯૬માં પચિનોએ તેમના પોતાના દિગ્દર્શનમાં બનેલી થિયેટ્રિકલ ડોક્યુડ્રામા ફિલ્મ 'લુકિંગ ફોર રિચાર્ડ' માં અભિનય કર્યો હતો, જેમાં વિલિયમ શેક્સપિયરના નાટકના દ્રશ્યો અને લોકપ્રિય સંસ્કૃતિમાં શેક્સપિયરની પ્રાસંગિકતા દર્શાવવામાં આવી હતી. આ ફિલ્મ બોક્સ ઓફિસ પર ફ્લોપ રહી હતી પરંતુ વિવેચકો તરફથી તેને સારો પ્રતિસાદ મળ્યો હતો.

૧૯૯૭માં આવેલી રહસ્યમય થ્રિલર ફિલ્મ 'ધ ડેવિલ્સ એડવોકેટ' માં પચિનોએ શેતાનની ભૂમિકા ભજવી હતી, જેમાં કીઆનુ રીવ્સ પણ મુખ્ય ભૂમિકામાં હતા. આ ફિલ્મ બોક્સ ઓફિસ પર 'સુપરહિટ' સાબિત થઈ હતી. જાણીતા વિવેચક રોજર એબર્ટે લખ્યું હતું કે, પચિનોએ શેતાનનું આ પાત્ર અદભુત ઉત્સાહ અને આનંદ સાથે ભજવ્યું છે.તે જ વર્ષે આવેલી બાયોગ્રાફીકલ ગેંગસ્ટર ડ્રામા ફિલ્મ 'ડોની બ્રાસ્કો' પણ બોક્સ ઓફિસ પર સુપરહીટ રહી હતી. આ ફિલ્મ ૧૯૭૦ના દાયકામાં ન્યૂયોર્કના કુખ્યાત 'બોનાનો માફિયા પરિવાર' ની અંદર ઘૂસણખોરી કરનાર અંડરકવર એફબીઆઈ એજન્ટ જોસેફ પિસ્ટોન (ડોની બ્રાસ્કો) ના વાસ્તવિક ઓપરેશન પર આધારિત હતી. આ ફિલ્મમાં પચિનોએ ન્યૂયોર્કના વાસ્તવિક ગેંગસ્ટર 'લેફ્ટી રુગિએરો ની જીવંત ભૂમિકા ભજવી હતી, જેઓ અજાણતામાં એફબીઆઈ એજન્ટ (જોની ડેપ) ને પોતાના માફિયા સામ્રાજ્યની અંદર લાવે છે જે બાદમાં આખા ગેંગનો સફાયો કરે છે.

૧૯૯૯માં પચિનોએ ઓસ્કારમાં મલ્ટિપલ નોમિનેશન મેળવનારી ફિલ્મ 'ધ ઇન્સાઇડર' માં રસેલ ક્રો સાથે એક ટીવી પ્રોડ્યુસરની ભૂમિકા ભજવી હતી, જેને વિવેચકોએ ખૂબ જ વખાણી હોવા છતાં ઊંચા બજેટને કારણે બોક્સ ઓફિસ પર તે 'ફ્લોપ' સાબિત થઈ હતી. આ જ વર્ષે તેઓ ઓલિવર સ્ટોનની ફિલ્મ 'એની ગિવન સન્ડે' માં પણ જોવા મળ્યા હતા, જે બોક્સ ઓફિસ પર 'એવરેજ' હિટ રહી હતી.

૨૦૦૦–૨૦૧૮: ટેલિવિઝન ભૂમિકાઓ અને રંગમંચ પર વાપસી

૨૦૦૦ની સાલથી પચિનોએ ત્રણ ગોલ્ડન ગ્લોબ એવોર્ડ જીત્યા હતા; જેમાં પ્રથમ એવોર્ડ ૨૦૦૧માં સિનેમા જગતમાં તેમના આજીવન યોગદાન બદલ સેસિલ બી ડીમિલ એવોર્ડ તરીકે આપવામાં આવ્યો હતો. ૨૦૦૦માં પચિનોએ જેરી ઓરબેક સાથે ઇરા લેવિસના નાટક પર આધારિત ઓછા બજેટની ફિલ્મ 'ચાઇનીઝ કોફી' માં અભિનય કર્યો હતો, જેને વિવિધ ફિલ્મ ફેસ્ટિવલમાં પ્રદર્શિત કરવામાં આવી હતી. મુખ્યત્વે બે મુખ્ય પાત્રો વચ્ચેની વન-ઓન-વન વાતચીત પર આધારિત આ ફિલ્મને પૂર્ણ કરવામાં લગભગ ત્રણ વર્ષનો સમય લાગ્યો હતો અને તેનું સંપૂર્ણ ભંડોળ પચિનોએ પોતે પૂરું પાડ્યું હતું.

'ચાઇનીઝ કોફી' ફિલ્મને પચિનો દ્વારા પ્રોડ્યુસ કરવામાં આવેલી અન્ય બે દુર્લભ ફિલ્મો 'ધ લોકલ સ્ટિગ્મેટિક' અને 'લુકિંગ ફોર રિચાર્ડ' ની સાથે 'પચિનો: એન એક્ટર્સ વિઝન' નામના એક ખાસ ડીવીડી બોક્સ સેટમાં સામેલ કરવામાં આવી હતી, જે ૨૦૦૭માં રિલીઝ થઈ હતી. પચિનોએ આ ફિલ્મો ધરાવતી ડિસ્ક માટે પ્રસ્તાવના અને ઉપસંહાર પણ તૈયાર કર્યા હતા.

૨૦૦૪ના વેનિસ ફિલ્મ ફેસ્ટિવલમાં પચિનો

૨૦૦૨માં પચિનોએ પ્રખ્યાત દિગ્દર્શક ક્રિસ્ટોફર નોલાનની મનોવૈજ્ઞાનિક થ્રિલર ફિલ્મ 'ઇન્સોમ્નિયા' માં અભિનય કર્યો હતો, જે આ જ નામની એક નોર્વેજીયન ફિલ્મની રિમેક હતી. આ ફિલ્મમાં તેમણે વિલિયમ્સ અને હિલેરી સ્વાન્ક જેવા કલાકારો સાથે કામ કર્યું હતું, જેમાં પચિનોએ અલાસ્કાના એક નાના શહેરમાં હત્યાની તપાસ કરવા આવેલા લોસ એન્જલસના એક અનુભવી ડિટેક્ટિવની મુખ્ય ભૂમિકા ભજવી હતી. વિવેચકો તરફથી પચિનો અને રોબિન વિલિયમ્સ બંનેના અભિનયના ખૂબ જ વખાણ કરવામાં આવ્યા હતા. સાથે આ ફિલ્મ બોક્સ ઓફિસ પર હિટ સાબિત થઈ હતી.

ત્યારબાદ આવેલી તેમની આગામી ફિલ્મ 'સિમોન' ને વિવેચકો તરફથી ખાસ પ્રશંસા ન મળી અને તે બોક્સ ઓફિસ પર 'ફ્લોપ' સાબિત થઈ હતી. ૨૦૦૨માં તેમણે 'પીપલ આઈ નો' ફિલ્મમાં એક પબ્લિસિસ્ટની ભૂમિકા ભજવી હતી, જેમાં પચિનોના અભિનયના વખાણ થયા હોવા છતાં આ નાની ફિલ્મ પર લોકોનું ખાસ ધ્યાન ગયું નહોતું અને તે બોક્સ ઓફિસ પર 'ફ્લોપ' રહી હતી.

પોતાની વ્યાવસાયિક સફળતા પછી ભાગ્યે જ સહાયક ભૂમિકા ભજવનારા પચિનોએ, ૨૦૦૩માં વિવેચકો અને બોક્સ ઓફિસ પર ભારે 'ડિઝાસ્ટર' સાબિત થયેલી ફિલ્મ 'ગીગ્લી' માં દિગ્દર્શક માર્ટિન બ્રેસ્ટના આગ્રહ ખાતર એક નાની ભૂમિકા સ્વીકારી હતી. ૨૦૦૩માં રિલીઝ થયેલી ફિલ્મ 'ધ રિક્રુટ' માં પચિનો એક સીઆઈએ રિક્રુટર તરીકે જોવા મળ્યા હતા અને તેમની સાથે કોલિન ફેરેલ પણ મુખ્ય ભૂમિકામાં હતા. આ ફિલ્મને મિશ્ર પ્રતિસાદ મળ્યો હતો અને તે બોક્સ ઓફિસ પર 'એવરેજ' હિટ રહી હતી, જોકે પચિનોએ આ ફિલ્મ વિશે જણાવ્યું હતું કે આ એવી ફિલ્મ હતી જેને તેઓ વ્યક્તિગત રીતે સમજી શક્યા નહોતા. ત્યારબાદ પચિનોએ ૨૦૦૩ની એચબીઓ મિની-સિરીઝ 'એન્જલ્સ ઇન અમેરિકા' માં વકીલ રોય કોનની ભૂમિકા ભજવી હતી, જે ટોની કુશ્નરના પુલિત્ઝર પ્રાઈઝ વિજેતા નાટક પર આધારિત હતી. આ શાનદાર અભિનય માટે પચિનોએ ૨૦૦૪માં તેમનો ત્રીજો ગોલ્ડન ગ્લોબ એવોર્ડ જીત્યો હતો.

૨૦૦૪માં આવેલી ફિલ્મ 'ધ મર્ચન્ટ ઓફ વેનિસ' માં પચિનોએ શાયલોકની ભૂમિકા ભજવી હતી. વિવેચકોએ પરંપરાગત રીતે એક વિલન તરીકે દર્શાવવામાં આવતા આ પાત્રમાં સંવેદનશીલતા અને ઊંડાણ લાવવા બદલ તેમના ખૂબ વખાણ કર્યા હતા. ૨૦૦૫માં આવેલી 'ટુ ફોર ધ મની' ફિલ્મમાં પચિનોએ એક સ્પોર્ટ્સ ગેમ્બલિંગ એજન્ટ અને મેથ્યુ મેકોનહીના માર્ગદર્શકની ભૂમિકા ભજવી હતી, જેને મિશ્ર પ્રતિસાદ મળ્યો હતો અને ઊંચા બજેટના કારણે તે બોક્સ ઓફિસ પર 'ફ્લોપ' સાબિત થઈ હતી. ધ વોશિંગ્ટન પોસ્ટના વિવેચકે લખ્યું હતું કે, પચિનોએ એટલી બધી વખત માર્ગદર્શકની ભૂમિકા ભજવી છે કે હવે તેમને કિંગમેકરનો એવોર્ડ મળવો જોઈએ. પચિનોએ તેમની મહાન ગેંગસ્ટર સીરીઝ ફિલ્મ 'ધ ગોડફાધર' ના આધારે વર્ષ ૨૦૦૬માં બનેલી વિડીયો ગેમ 'ધ ગોડફાધર: ધ ગેમ' માં માઈકલ કોર્લિયોનના પાત્ર માટે પોતાનો અવાજ કે ચહેરો આપવાની સાફ ના પાડી દીધી હતી, જેના કારણે ઇલેક્ટ્રોનિક આર્ટસ નામની ગેમ કંપનીને તેમનો ચહેરો કે અવાજ વાપરવાની કાનૂની મંજૂરી મળી નહોતી. વાસ્તવમાં, તેમણે આ રમત માટે એટલા માટે ના પાડી હતી કારણ કે તે જ વર્ષે તેઓ પહેલેથી જ અન્ય એક હરીફ ગેમિંગ કંપની વિવેન્ડી ગેમ્સ સાથે પોતાની જ પ્રખ્યાત ક્લ્ટ ક્લાસિક ગેંગસ્ટર ફિલ્મ સ્કારફેસ (૧૯૮૩) પર આધારિત વિડીયો ગેમ 'સ્કારફેસ: ધ વર્લ્ડ ઇઝ યોર્સ' માટે કરારબદ્ધ થઈ ચૂક્યા હતા. તે કરારની શરતો મુજબ તેઓ એકસાથે બે મોટી વિડીયો ગેમ્સને પોતાની મંજૂરી આપી શકે તેમ નહોતા. જોકે, તેમણે 'સ્કારફેસ' ગેમમાં પોતાનો ચહેરો વાપરવાની સંપૂર્ણ મંજૂરી આપી હતી, પરંતુ ઉંમરના કારણે બદલાતા અવાજને લીધે ટોની મોન્ટાનાના પાત્રના અવાજ માટે તેમણે પોતે જ અલ્ પચિનો જેવો જ અવાજ ધરાવતા એક અન્ય ડબિંગ કલાકારની પસંદગી કરી આપી હતી.

૨૦૦૬માં અમેરિકન ફિલ્મ ઇન્સ્ટિટ્યૂટ દ્વારા પચિનોને ૩૫મા લાઈફ એચીવમેન્ટ એવોર્ડથી સન્માનિત કરવામાં આવ્યા હતા અને આ જ વર્ષે ટ્રિનિટી કોલેજ ડબલિનની યુનિવર્સિટી ફિલોસોફિકલ સોસાયટીએ તેમને માનદ સભ્યપદ એનાયત કર્યું હતું.

૨૦૦૭માં પચિનોએ જોર્જ ક્લૂની અને બ્રેડ પિટ જેવા સ્ટાર્સ સાથે 'ઓશન્સ થર્ટીન' ફિલ્મમાં વિલન અને કેસિનો માલિક વિલી બેન્કની ભૂમિકા ભજવી હતી, જે બોક્સ ઓફિસ પર વૈશ્વિક સ્તરે ૩૧ કરોડ ડોલરની કમાણી કરીને મોટી 'સુપરહિટ' સાબિત થઈ હતી. ૨૦૦૮માં આવેલી તેમની રોમાંચક ફિલ્મ '૮૮ મિનિટ્સ' વિવેચકોને પસંદ ન આવી છતાં પચિનોના અભિનયના વખાણ થયા હતા, અને તે બોક્સ ઓફિસ પર 'એવરેજ' હિટ રહી હતી. આ જ વર્ષે તેઓ રોબર્ટ ડી નિરો સાથે 'રાઇટિયસ કિલ' ફિલ્મમાં ન્યૂ યોર્કના ડિટેક્ટિવ તરીકે જોવા મળ્યા હતા, જેને નકારાત્મક રિવ્યૂઝ મળ્યા હોવા છતાં તે બોક્સ ઓફિસ પર પોતાની પડતર કિંમત વસૂલ કરીને 'એવરેજ' હિટ સાબિત થઈ હતી.

૨૦૧૦માં પચિનોએ રંગમંચ પર વાપસી કરીને 'ધ મર્ચન્ટ ઓફ વેનિસ' નાટકમાં શાયલોકનું પાત્ર ભજવ્યું હતું, જેના માટે તેમને ટોની એવોર્ડનું નોમિનેશન મળ્યું હતું. આ જ વર્ષે તેમણે એચબીઓ કંપનીની બાયોપિક ફિલ્મ 'યૂ ડોન્ટ નો જેક' માં ડૉ. જેક કેવોર્કિયનની ભૂમિકા ભજવી હતી, જેના માટે પચિનોએ તેમનો બીજો એમી એવોર્ડ અને ચોથો ગોલ્ડન ગ્લોબ એવોર્ડ જીત્યો હતો. ૨૦૧૧માં તેઓ 'જેક એન્ડ જીલ' નામની કોમેડી ફિલ્મમાં જોવા મળ્યા હતા. આ ફિલ્મને વિવેચકોએ ખૂબ જ ખરાબ ગણાવી હતી અને પચિનોને તેના માટે સૌથી ખરાબ સહાયક અભિનેતાનો એવોર્ડ મળ્યો હતો. જોકે, બોક્સ ઓફિસ પર આ ફિલ્મ ૧૪.૯ કરોડ ડોલરની કમાણી સાથે 'એવરેજ' હિટ રહી હતી. પચિનોએ પાછળથી ખુલાસો કર્યો હતો કે તેમના એકાઉન્ટન્ટની જેલ થવાને કારણે તેઓ આર્થિક મુશ્કેલીમાં હતા, તેથી પૈસાની તાત્કાલિક જરૂરિયાત પૂરી કરવા માટે તેમણે આ ફિલ્મ સ્વીકારી હતી.

૪ સપ્ટેમ્બર ૨૦૧૧ના રોજ પચિનોને તેમના દ્વારા દિગ્દર્શિત અને અભિનીત ડોક્યુમેન્ટ્રી-ડ્રામા ફિલ્મ 'વાઇલ્ડ સાલોમે' ના પ્રીમિયર પહેલાં પ્રતિષ્ઠિત 'ગ્લોરી ટુ ધ ફિલ્મમેકર' એવોર્ડથી સન્માનિત કરવામાં આવ્યા હતા. આ ફિલ્મમાં હેરોદની ભૂમિકા ભજવનારા પચિનોએ આ ફિલ્મને પોતાની કારકિર્દીનો સૌથી વ્યક્તિગત પ્રોજેક્ટ ગણાવ્યો હતો. ફેબ્રુઆરી ૨૦૧૨માં અમેરિકાના રાષ્ટ્રપતિ બરાક ઓબામાએ પચિનોને દેશના સર્વોચ્ચ કલા સન્માન 'નેશનલ મેડલ ઓફ આર્ટસ' થી નવાજ્યા હતા. આ જ સમયગાળા દરમિયાન પચિનોએ રંગમંચ પર વાપસી કરીને 'ગ્લેનગેરી ગ્લેન રોસ' નાટકની ૩૦મી વર્ષગાંઠના વિશેષ શો કર્યા હતા. ૨૦૧૩માં તેઓ મ્યુઝિક પ્રોડ્યુસરના જીવન પર આધારિત એચબીઓ કંપનીની બાયોપિક ફિલ્મ 'ફિલ સ્પેક્ટર' માં મુખ્ય ભૂમિકામાં જોવા મળ્યા હતા.

૨૦૧૪ના ટોરોન્ટો ઇન્ટરનેશનલ ફિલ્મ ફેસ્ટિવલમાં પચિનો

૨૦૧૫માં પચિનોએ કોમેડી-ડ્રામા ફિલ્મ 'ડેની કોલિન્સ' માં એક ઘરડા રોક સ્ટારની મુખ્ય ભૂમિકા ભજવી હતી. આ અદભુત અભિનય માટે તેમને ગોલ્ડન ગ્લોબ એવોર્ડમાં શ્રેષ્ઠ અભિનેતાનું નોમિનેશન મળ્યું હતું અને બોક્સ ઓફિસ પર આ નાની ફિલ્મને 'એવરેજ' સફળતા મળી હતી. આ જ વર્ષના અંતમાં તેમણે ખાસ તેમના માટે જ લખાયેલા નાટક 'ચાઇના ડોલ' ના સતત ૯૭ શો કરીને રંગમંચ પર ઇતિહાસ રચ્યો હતો. ૨૦૧૬માં કલા જગતમાં તેમના અતુલ્ય યોગદાન બદલ પ્રતિષ્ઠિત 'કેનેડી સેન્ટર ઓનર' એવોર્ડથી તેમનું સન્માન કરવામાં આવ્યું હતું. નિવૃત્તિ લેવા અંગે પચિનોએ ખુલાસો કર્યો હતો કે અભિનય હવે તેમના સ્વભાવનો એક એવો ભાગ બની ગયો છે કે તેઓ ક્યારેય કામ છોડવા વિશે વિચારી પણ શકતા નથી. ત્યારબાદ ૭ એપ્રિલ ૨૦૧૮ના રોજ રિલીઝ થયેલી એચબીઓની ટેલિવિઝન ફિલ્મ 'પાટેર્નો' માં તેમણે ફૂટબોલ કોચ જો પાટેર્નોની યાદગાર ભૂમિકા ભજવી હતી.

૨૦૧૯–વર્તમાન

૨૦૧૯માં પચિનોએ હોલિવૂડના સુપરસ્ટારસ બ્રેડ પિટ અને લિયોનાર્ડો ડીકેપ્રીયો સાથે ક્વેન્ટિન ટેરેન્ટિનોની કોમેડી-ડ્રામા ફિલ્મ 'વન્સ અપોન અ ટાઇમ ઇન હોલીવુડ' માં અભિનય કર્યો હતો. આ ફિલ્મ બોક્સ ઓફિસ પર એક મોટી 'સુપરહિટ' સાબિત થઈ હતી. ૨૦૧૯ના અંતમાં પચિનોએ માર્ટિન સ્કોર્સેઝની પ્રખ્યાત ગેંગસ્ટર નેટફ્લિક્સ ફિલ્મ 'ધ આઇરિશમેન' માં રોબર્ટ ડી નિરો અને જો પેસી સાથે અભિનય કર્યો હતો. આ ફિલ્મમાં તેમણે અમેરિકાના ઇતિહાસના પ્રખ્યાત અને વાસ્તવિક વ્યક્તિ જીમી હોફાની જીવંત ભૂમિકા ભજવી હતી, જેઓ 'ઇન્ટરનેશનલ બ્રધરહુડ ઓફ ટીમસ્ટર્સ' નામના શક્તિશાળી લેબર યુનિયનના પ્રમુખ હતા. ૧૯૭૫માં તેમના રહસ્યમય રીતે ગુમ થવાની અને અમેરિકન માફિયાઓ સાથેના તેમના સંબંધોની સત્ય ઘટના પર આધારિત આ ફિલ્મમાં પચિનોના પર્ફોર્મન્સને ભારે પ્રશંસા મળી હતી. આ પ્રથમ વખત હતું જ્યારે પચિનોએ સ્કોર્સેઝ સાથે કામ કર્યું હોય. પચીનોના શાનદાર અભિનય માટે તેમને ઓસ્કાર એવોર્ડ્સમાં બેસ્ટ સપોર્ટિંગ એક્ટર (શ્રેષ્ઠ સહ-અભિનેતા) તરીકેનું નોમિનેશન પણ મળ્યું હતું, અને ડિજિટલ પ્લેટફોર્મ રિલીઝ હોવા છતાં ઓનલાઇન મીડિયામાં આ ફિલ્મને પ્રચંડ સફળતા રહી હતી.

ફેબ્રુઆરી ૨૦૨૦માં પચિનોએ એમેઝોન પ્રાઇમ વીડિયોની સિરીઝ 'હન્ટર્સ' માં મેયર ઓફરમેન નામના કાલ્પનિક નાઝી શિકારીની ભૂમિકા ભજવી હતી, જે ૨૦૦૩ પછી તેમની પ્રથમ ટેલિવિઝન સિરીઝ હતી અને તે પ્રેક્ષકોમાં ખૂબ જ લોકપ્રિય થઈ હતી. ૨૦૨૧માં પચિનોએ રિડલી સ્કોટની ફિલ્મ 'હાઉસ ઓફ ગુચી' માં એલ્ડો ગુચીની યાદગાર ભૂમિકા ભજવી હતી. આ ફિલ્મને મિશ્ર પ્રતિસાદ મળ્યો હોવા છતાં પચિનો, લેડી ગાગા અને જેરેડ લેટોના અભિનયને ખાસ હાઇલાઇટ કરવામાં આવ્યો હતો. આ ફિલ્મ બોક્સ ઓફિસ 'એવરેજ' રહી હતી. આ જ વર્ષે તેઓ 'અમેરિકન ટ્રેઇટર' ફિલ્મમાં મુખ્ય બચાવ પક્ષના વકીલ તરીકે જોવા મળ્યા હતા. ત્યારબાદ ૨૦૨૩માં પચિનોએ માઇકલ કીટનની ફિલ્મ 'નોક્સ ગોઝ અવે' માં જેવિયર ક્રેન નામના ચોર અને ફિક્સરની સહાયક ભૂમિકા ભજવીને મોટા પડદા પર વાપસી કરી હતી, જેનું પ્રીમિયર ટોરોન્ટો ઇન્ટરનેશનલ ફિલ્મ ફેસ્ટિવલમાં કરવામાં આવ્યું હતું.

૨૦૨૪માં પચિનોએ વિખ્યાત કલાકાર અમેદેઓ મોદિગ્લિઆનીના જીવન પર આધારિત ફિલ્મ 'મોદી, થ્રી ડેઝ ઓન ધ વિંગ ઓફ મેડનેસ' માં અભિનય કર્યો હતો, જેનું નિર્માણ તેમણે જોની ડેપ અને બેરી નવીદી સાથે મળીને કર્યું હતું. આ ફિલ્મ ડેનિસ મેકઇન્ટાયરના એક પ્રખ્યાત નાટક પર આધારિત હતી.

૨૦૨૫માં પચિનો પાંચ સ્વતંત્ર (ઇન્ડિપેન્ડન્ટ) ફિલ્મોમાં જોવા મળ્યા હતા. તેમની પ્રથમ ફિલ્મ એક હોરર ફિલ્મ 'ધ રિચ્યુઅલ' હતી, જેમાં તેમણે ડેન સ્ટીવન્સ સાથે પાદરી થિયોફિલસ રીસિન્જરની ભૂમિકા ભજવી હતી; જોકે આ ફિલ્મને વિવેચકો તરફથી નકારાત્મક સમીક્ષાઓ મળી હતી. તેમની બીજી ફિલ્મ 'બિલી નાઈટ' હતી, જે યુવા ફિલ્મ નિર્માતાઓની મહત્વાકાંક્ષા અને કલાત્મક સફર પર આધારિત એક ડ્રામા ફિલ્મ હતી. આ ફિલ્મનું પ્રીમિયર રોડ આઇલેન્ડ ઇન્ટરનેશનલ ફિલ્મ ફેસ્ટિવલમાં કરવામાં આવ્યું હતું. સપ્ટેમ્બર ૨૦૨૫માં તેઓ અન્ય બે ફિલ્મો 'ડેડ મેન્સ વાયર' અને 'ઇન ધ હેન્ડ ઓફ દાંતે' માં નાની ભૂમિકાઓમાં જોવા મળ્યા હતા, જે બંને ફિલ્મોનું વર્લ્ડ પ્રીમિયર વેનિસ ઇન્ટરનેશનલ ફિલ્મ ફેસ્ટિવલમાં કરવામાં આવ્યું હતું. 'ડેડ મેન્સ વાયર' માં તેમણે એક અમીર મોર્ટગેજ બ્રોકરની ભૂમિકા ભજવી હતી, જે તેમના ભૂતકાળના પ્રખ્યાત અભિનયની યાદ અપાવે છે. જ્યારે નેટફ્લિક્સની ફિલ્મ 'ઇન ધ હેન્ડ ઓફ દાંતે' માં તેમની ટૂંકી ભૂમિકાના વિવેચકો દ્વારા ખૂબ જ વખાણ કરવામાં આવ્યા હતા. ૨૦૨૫ની તેમની છેલ્લી ફિલ્મ નિક પિઝોલેટોની 'ઇઝીઝ વોલ્ટ્ઝ' હતી, જેમાં તેઓ વિન્સ વોન સાથે જોવા મળ્યા હતા અને તેનું પ્રીમિયર ટોરોન્ટો ઇન્ટરનેશનલ ફિલ્મ ફેસ્ટિવલમાં વિશેષ પ્રસ્તુતિ તરીકે કરવામાં આવ્યું હતું.

૨૦૨૬માં પચિનોની જૂની ફિલ્મ 'એની ગિવન સન્ડે' ના એક પ્રખ્યાત લોકર રૂમ મોનોલોગ (ભાષણ)નો ઉપયોગ ફાઈઝર કંપનીના એક રાષ્ટ્રીય વિજ્ઞાપન અભિયાન (જાહેરાત) માટે કરવામાં આવ્યો હતો. ત્યારબાદ જૂન ૨૦૨૬માં તેઓ 'કિલિંગ કાસ્ટ્રો' ફિલ્મમાં સીઆઈએ એજન્ટ રોબર્ટ માહ્યુની મુખ્ય ભૂમિકામાં જોવા મળ્યા હતા, જેનું ભવ્ય પ્રીમિયર ટ્રાઇબેકા ફિલ્મ ફેસ્ટિવલમાં કરવામાં આવ્યું હતું.

તેમજ વર્ષ ૨૦૨૬ના અંતમાં અથવા ૨૦૨૭ની શરૂઆતમાં પચીનો ઓસ્કાર વિજેતા દિગ્દર્શક બેરી લેવિન્સનની આગામી મિસ્ટ્રી થ્રિલર ફિલ્મ 'એસેસિનેશન' માં પણ જોવા મળશે. અમેરિકન પ્રમુખ જ્હોન એફ. કેનેડીની હત્યાના કાવતરા પર આધારિત આ ફિલ્મમાં પચીનો સાથે, બ્રેન્ડન ફ્રેઝર, જેસિકા ચેસ્ટેન, બ્રાયન ક્રેન્સ્ટન અને જેરેડ લેટો જેવા મોટા હોલીવુડ ના કલાકારો પણ મહત્વના પાત્રો ભજવતા જોવા.

પ્રતિભાવ અને વારસો

અલ પચિનોને અવારનવાર સિનેમા અને થિયેટર જગતના સૌથી મહાન અને પ્રભાવશાળી અભિનેતાઓમાંથી એક માનવામાં આવે છે. તેમના ખાસ પ્રકારના તીવ્ર, સચોટ અને ગંભીર તેમજ વિસ્ફોટક અભિનય માટે જાણીતા પચિનોએ ન્યૂ હોલીવુડ યુગના એક દિગ્ગજ તરીકે નામના મેળવી હતી. ધ ગ્લોબ એન્ડ મેલ અખબારે તેમને ૧૯૭૦ના દાયકાની શરૂઆતની કાઉન્ટર-કલ્ચર પેઢીના આઇકોન તરીકે વર્ણવ્યા હતા. રોન રોઝનબૌમે તેમને હોલીવુડના હેમ્લેટ કહ્યા હતા, જ્યારે ઓલિવર સ્ટોને તેમને સ્ટ્રીટ હેમ્લેટ તરીકે ઓળખાવ્યા હતા, જે વિલિયમ શેક્સપિયરની કૃતિઓ પ્રત્યે પચિનોના ઊંડા આદર અને તેમના પાત્રોમાં શેક્સપિયરન શૈલીની ગંભીર કરુણતા લાવવાની તેમની ક્ષમતાને દર્શાવે છે.

વર્ષ ૨૦૦૩માં, બ્રિટિશ ટેલિવિઝન દર્શકોએ ચેનલ ૪ ના એક સર્વેક્ષણમાં પચિનોને સર્વકાલીન મહાન મૂવી સ્ટાર તરીકે ચૂંટ્યા હતા, અને તેમનો સમાવેશ વીએચ૧ ની સર્વકાલીન ૨૦૦ મહાન પૉપ કલ્ચર આઇકોન્સની યાદીમાં પણ કરવામાં આવ્યો છે. વર્ષ ૨૦૨૨માં, એસ્કવાયર મેગેઝિનની સિનેમા ઇતિહાસના ૧૦૦ સૌથી મહાન અભિનેતાઓની યાદીમાં પચિનોને છઠ્ઠા ક્રમે રાખવામાં આવ્યા હતા. તેના પછીના વર્ષે, એસ્કવાયર મેગેઝિને તેમનો સમાવેશ ૧૦ શ્રેષ્ઠ જીવંત અભિનેતાઓની યાદીમાં પણ કર્યો હતો.

લી સ્ટ્રાસ્બર્ગના માર્ગદર્શન હેઠળ તેઓ 'મેથડ એક્ટિંગ' શૈલી શીખ્યા હતા. સ્ટ્રાસ્બર્ગે તેમના વિશે કહ્યું હતું કે, કેટલાક કલાકારો પાત્રો ભજવે છે, જ્યારે અલ પચિનો પોતે તે પાત્ર બની જાય છે. તેઓ પાત્રની ઓળખ એટલી હદ સુધી અપનાવી લે છે કે નાટક કે ફિલ્મ પૂરી થયા પછી પણ લાંબા સમય સુધી તે જ પાત્રમાં જીવતા રહે છે. જોકે, પચિનો પોતે એવું માને છે કે તેઓ સંપૂર્ણપણે માત્ર મેથડ એક્ટર નથી, પરંતુ તેમના મતે શબ્દો એ તેમની ભાવનાત્મક સ્થિતિનો જ એક ભાગ હોવા જોઈએ અને તેઓ સ્ક્રિપ્ટ વગર પણ દ્રશ્યો સુધારવાની કસરતો કરે છે. 'શિકાગો રીડર' અખબારે આ બાબતની પ્રશંસા કરતા લખ્યું હતું કે, તેઓ એક એવા અદ્ભુત મેથડ એક્ટર છે જેઓ સહજ અભિવ્યક્તિ મેળવવા માટે ક્યારેય અચકાતા નથી.

'ડોગ ડે આફ્ટરનૂન' અને 'સર્પિકો' ફિલ્મોના દિગ્દર્શક સિડની લ્યુમેટે કહ્યું હતું કે, બધું જ તેમના અંદરના એક અદ્ભુત કેન્દ્રમાંથી બહાર આવે છે. હું તેની નજીક જવાનું પણ ન વિચારી શકું, કારણ કે તે પૃથ્વીના કેન્દ્રની નજીક જવા જેવું હશે. તેમના અંદરથી જે બહાર આવે છે તે માત્ર અને માત્ર તેમનું પોતાનું જ છે. 'ધ ગોડફાધર' ફિલ્મોના ડાયરેક્ટર ફ્રાન્સિસ ફોર્ડ કોપોલાએ જણાવ્યું હતું કે, મેં સૌથી પહેલા તેમની બુદ્ધિમત્તા નોંધી હતી. તેઓ પોતાની આવડતનો ઉપયોગ કેવી રીતે કરવો તે સારી રીતે જાણે છે. તેમની પાસે જે આકર્ષક ગુણ અને એક ખાસ પ્રકારનો અંદાજ છે, તેનો તેઓ ભરપૂર ઉપયોગ કરે છે. આ સિવાય, ફિલ્મના સ્ક્રીન ટેસ્ટના એડિટિંગનું કામ સંભાળતા માર્સિયા લુકાસે નોંધ્યું હતું કે, પચિનોની આંખોમાં સામેની વ્યક્તિને એકદમ ઝંઝેડી નાખવાનું આકર્ષણ છે.

પચિનો ની ઘણી ફિલ્મો અમેરિકન સિનેમામાં ક્લાસિક એટલે કે સર્વકાલીન શ્રેષ્ઠ બની ચૂકી છે, જેમાંની તેમની ચાર ફિલ્મો ધ ગોડફાધર, ધ ગોડફાધર પાર્ટ ટુ, ડોગ ડે આફ્ટરનૂન અને સ્કારફેસ ને યુ.એસ. લાઇબ્રેરી ઓફ કોંગ્રેસની નેશનલ ફિલ્મ રજિસ્ટ્રી માં સાચવવા માટે પસંદ કરવામાં આવી છે. ફિલ્મ ઉદ્યોગના કલાકારો દ્વારા પસંદ કરાયેલી ટાઇમ આઉટ મેગેઝિનની ૧૦૦ સર્વશ્રેષ્ઠ ફિલ્મોની યાદીમાં પણ પચિનોની ત્રણ ફિલ્મોનો સમાવેશ કરવામાં આવ્યો છે.

લોકપ્રિય સંસ્કૃતિમાં

૨૦૧૨માં વિનવુડ અને ૨૦૨૫માં બાર્સિલોના ખાતે પચિનોના "ટોની મોન્ટાના" પાત્રના ભીંતચિત્રો (મ્યુરલ્સ)

પચિનો નો ટેલિવિઝન, સંગીત, ફિલ્મો અને વ્યાપક લોકપ્રિય સંસ્કૃતિ (પોપ કલ્ચર) માં ઘણો ઉલ્લેખ કરવામાં આવ્યો છે. આનું મુખ્ય કારણ તેમની ફિલ્મોની ભૂમિકાઓ છે, જેણે તેમને હિંમત, મક્કમતા અને શક્તિના એક કાયમી સાંસ્કૃતિક પ્રતીક બનાવ્યા છે. વલ્ચર મેગેઝિને ભારપૂર્વક જણાવ્યું હતું કે, "તેમને 'અનન્ય અલ પચિનો' કહેવાનું મન થાય, ભલે તેઓ વિશ્વમાં સૌથી વધુ નકલ (નકલ ઉતારવામાં) કરવામાં આવતા અભિનેતા છે." એન્ટરટેઇનમેન્ટ વીકલીએ જણાવ્યું હતું કે તેમની અભિનયની આગવી શૈલીએ "કોમેડી કલાકારોની આખી પેઢીઓને રોજગારી પૂરી પાડી છે." તેમની સૌથી વધુ નકલ કરનારા પ્રખ્યાત કલાકારોમાં કેવિન સ્પેસી અને એલેક બાલ્ડવિનનો સમાવેશ થાય છે. સ્પેસીએ કહ્યું હતું કે, "આપણે બધા અલ પચિનોની નકલ કરવાનું પસંદ કરીએ છીએ તેનું કારણ એ છે કે તેમણે એવા પાત્રો ભજવ્યા છે જે અવિસ્મરણીય છે, અને અલ પચિનો માટે આ માત્ર એક વ્યવસાય નથી, પણ એક કળા છે."

તેમના અદ્ભુત પાત્રાલેખનો અમેરિકન ફિલ્મ ઇન્સ્ટિટ્યૂટની ૧૦૦ યર્સ... શ્રેણીમાં સ્થાન પામ્યા છે, જેમાં ૧૦૦ મહાન ફિલ્મી પાત્રોની યાદીમાં તેમના બે પાત્રો (નાયક તરીકે ફ્રેન્ક સેર્પિકો અને ખલનાયક તરીકે માઇકલ કોર્લિયોન) નો સમાવેશ થાય છે. અમેરિકન સિનેમાના ટોચના ૧૦૦ સંવાદો ની યાદીમાં તેમના ત્રણ સંવાદો સામેલ છે: માઇકલ કોર્લિયોનનો "તમારા મિત્રોને નજીક રાખો, પણ તમારા દુશ્મનોને વધુ નજીક રાખો"; ટોની મોન્ટાનાનો "સે હેલો ટુ માય લીટલ ફ્રેન્ડ!"; અને સોની વોર્ટકિકનો "એટિકા! એટિકા!". મોટા પડદાથી આગળ વધીને લોકપ્રિય બનેલા અન્ય સંવાદોમાં ...એન્ડ જસ્ટિસ ફોર ઓલ ફિલ્મનો "આખી ટ્રાયલ જ નિયમ વિરુદ્ધ છે!", સેન્ટ ઓફ અ વુમન ફિલ્મનો "હૂ-આહ!", અને ધ ગોડફાધર પાર્ટ ૩ ફિલ્મનો "જેમ મેં વિચાર્યું કે હું બહાર નીકળી ગયો છું, તેઓ મને પાછો અંદર ખેંચી લે છે" નો સમાવેશ થાય છે. ધ વોશિંગ્ટન પોસ્ટે જણાવ્યું હતું કે, "અન્ય લગભગ કોઈપણ અભિનેતા કરતાં તેમની સાથે સંવાદોની વધુ અમીટ રેખાઓ જોડાયેલી છે, જે માત્ર પાત્રો કેવી રીતે લખાયા હતા તેનો જ નહીં પરંતુ તેમણે કેવી રીતે તે પાત્રોને પોતાના બનાવી લીધા તેનો પુરાવો છે." એમ્પાયર મેગેઝિને વિશ્વભરના વાચકોના મતદાન દ્વારા માઇકલ કોર્લિયોન અને ટોની મોન્ટાનાને અત્યાર સુધીના સૌથી મહાન ફિલ્મી પાત્રો તરીકે પસંદ કર્યા હતા. એન્ટરટેઇનમેન્ટ વીકલીએ ડોની બ્રાસ્કો ફિલ્મમાં તેમની લેફ્ટી રુગિએરોની ભૂમિકાને "૧૦૦ સૌથી મહાન અભિનય જેમને ઓસ્કાર મળવો જોઈતો હતો પણ મળ્યો નથી" ની યાદીમાં સામેલ કરી હતી.

પચિનોએ મનોરંજન ઉદ્યોગની અસંખ્ય હસ્તીઓને પ્રભાવિત કર્યા છે અને તેમના દ્વારા તેઓ પ્રશંસા પામ્યા છે, જેમાં સ્ટીવ બુસેમી, જેફ્રી રાઈટ, બોબી કેનાવાલે, જેવિયર બાર્ડેમ, માઈકલ ઈમ્પેરિઓલી અને જેમી ફોક્સ વગેરેનો સમાવેશ થાય છે. જોન કુસાક, રસેલ ક્રો, જોની ડેપ, કોલિન ફેરેલ અને મેથ્યુ મેકકોનાઘી સહિતના તેમના કેટલાક સહ-કલાકારોએ (કો-સ્ટાર્સ) પણ સ્વીકાર્યું હતું કે પચિનો આ પ્રોજેક્ટ્સમાં સામેલ હોવાની ખાતરી થયા પછી જ તેઓ તેમાં જોડાવા માટે સહમત થયા હતા.

બોલિવૂડ પર અલ પચીનોનો પ્રભાવ

હોલીવુડના દિગ્ગજ અભિનેતા અલ પચીનો ની અભિનય શૈલી, સંવાદોની રજૂઆત અને તેમના આઇકોનિક પાત્રોએ ભારતીય સિનેમા એટલે કે બોલિવૂડ જગત પર એક ઊંડી અને કાયમી છાપ છોડી છે. બોલિવૂડના મહાનાયક અમિતાભ બચ્ચન ની પ્રખ્યાત ફિલ્મ અગ્નિપથ માં વિજય દીનાનાથ ચૌહાણનું પાત્ર, તેમની વૉઇસ એક્ટિંગ અને ડાયલોગ બોલવાનો વિશિષ્ટ લહેકો પણ અલ પચીનોએ સ્કારફેસ ફિલ્મમાં અપનાવેલી અવાજની શૈલીથી ભારે પ્રેરિત હતો.

બોલિવૂડના પ્રખ્યાત અભિનેતા સંજય દત્ત એ પોતે એક ઈન્ટરવ્યુમાં ખુલાસો કર્યો હતો કે તેઓ અલ પચીનોની સુપ્રસિદ્ધ ફિલ્મ સ્કારફેસ માં તેમના અભિનયથી એટલા પ્રભાવિત થયા હતા કે તેઓ તે પાત્રને બોલિવૂડમાં પોતાની રીતે જીવંત કરવા માંગતા હતા. આ જ પ્રેરણાના પરિણામે તેમણે પોતાની કરિયરની સૌથી યાદગાર ફિલ્મ વાસ્તવ કરી, જેમાં પચીનોના ટોની મોન્ટાના પાત્રની ઝલક તેમના રઘુ ના આઇકોનિક પાત્રમાં સ્પષ્ટ જોવા મળી હતી.

આ સિવાય ભારતીય ફિલ્મ નિર્માતાઓએ અલ પચીનોની ફિલ્મોની વાર્તા અને પાત્રોને દેશી રંગમાં ઢાળીને ઘણી હિટ ફિલ્મો આપી છે. અભિનેતા મિથુન ચક્રવર્તી ની ૧૯૮૯માં આવેલી ફિલ્મ મુજરીમ પણ અલ પચીનોની સ્કારફેસ ફિલ્મનું જ એક શાનદાર ભારતીય રૂપાંતરણ હતું, જેમાં મિથુનદાએ પચીનોની એક્ટિંગ સ્ટાઇલને પોતાની આગવી રીતે પડદા પર ઉતારી હતી. આ ઉપરાંત રામ ગોપાલ વર્માની ફિલ્મ સરકાર (પચિનો ની ગોડફાધર ફિલ્મ થી પ્રેરિત) માં અભિષેક બચ્ચન નું પાત્ર અને પ્રકાશ ઝા ની ફિલ્મ રાજનીતિ માં રણબીર કપૂર નું પાત્ર પણ માઇકલ કોર્લિયોન પાત્રની ભારતીય આવૃત્તિ સમાન હતું. રણબીર કપૂરના આ જ અભિનય કૌશલ્યને જોઈને પ્રખ્યાત ફિલ્મ ડિરેક્ટર સંદીપ રેડ્ડી વંગાએ એક ઈન્ટરવ્યુમાં કહ્યું હતું કે, રણબીર કપૂર એ રૉબર્ટ ડી નીરો, અલ પચીનો અને કમલ હાસનનું અદભુત મિશ્રણ છે. ખાસ વાત એ છે કે રણબીર કપૂરે ન્યૂ યોર્કની લી સ્ટ્રાબર્ગ થિયેટર એન્ડ ફિલ્મ ઇન્સ્ટિટ્યૂટમાંથી અભિનયની સત્તાવાર તાલીમ લીધી છે, જ્યાંથી ભૂતકાળમાં ખુદ અલ પચીનોએ પણ એક્ટિંગ શીખી હતી. રણબીરે તાજેતરમાં આપેલા એક ઇન્ટરવ્યુમાં ખુલાસો કર્યો હતો કે જ્યારે તેઓ ન્યૂ યોર્કમાં વિદ્યાર્થી (સ્ટુડન્ટ) તરીકે અભ્યાસ કરી રહ્યા હતા, ત્યારે અલ પચીનો બ્રોડવે થિયેટર પર સલોમી નાટક નું રીડિંગ કરી રહ્યા હતા. તે સમયે પચીનો તરફથી માત્ર એક નાની પ્રશંસા કે ઝલક મેળવવા માટે રણબીર સતત ત્રણ કલાક સુધી બહાર લાઈનમાં ઊભા રહ્યા હતા.

નવા યુગના સિનેમાની વાત કરીએ તો, નવાઝુદ્દીન સિદ્દીકી એ ગેંગ્સ ઓફ વાસેપુર ફિલ્મમાં ભજવેલું ફેઝલ ખાનનું પાત્ર પણ પચીનોની છાપ ધરાવતું હતું. બોલિવૂડના જાણીતા અભિનેતા અલી ફઝલ બાળપણથી જ અલ પચીનોના ખૂબ મોટા ફેન રહ્યા છે. લંડનમાં એક નાટક દરમિયાન ફઝલને ખુદ પચીનોને રૂબરૂ મળવાની અને તેમની સાથે વાતચીત કરવાની સુવર્ણ તક મળી હતી, જેને તેઓ પોતાના જીવનની સૌથી યાદગાર ક્ષણ ગણાવે છે. ફઝલ સહિત બોલિવૂડના અસંખ્ય કલાકારોએ જાહેરમાં સ્વીકાર્યું છે કે અલ પચીનોના અભિનેત્વે સિનેમા પ્રત્યેની તેમની સમજને સંપૂર્ણપણે બદલી નાખી છે.

ફિલ્મોગ્રાફી

અલ પચિનો ફિલ્મોગ્રાફી પણ જુઓ.

વર્ષ	ફિલ્મ	યોગદાન				ભૂમિકા	નોંધ
		નિર્દેશક	નિર્માતા	લેખક	અભિનેતા
૧૯૬૯	મી, નેટલી				હા	ટોની	મુખ્ય ભૂમિકા — પ્રથમ ફિલ્મ
૧૯૭૧	ધ પેનિક ઇન નીડલ પાર્ક				હા	બોબી	મુખ્ય ભૂમિકા
૧૯૭૨	ધ ગોડફાધર				હા	માઇકલ કોર્લિયોની	સહ અભિનેતા માટે ઓસ્કાર નામાંકન
૧૯૭૩	સ્કેરક્રો				હા	ફ્રાન્સિસ લાયનલ ડેલ્બુચી	મુખ્ય ભૂમિકા
૧૯૭૩	સેર્પિકો				હા	ફ્રેન્ક સેર્પિકો	મુખ્ય અભિનેતા માટે ઓસ્કાર નામાંકન
૧૯૭૪	ધ ગોડફાધર પાર્ટ ૨				હા	માઇકલ કોર્લિયોની	મુખ્ય અભિનેતા માટે ઓસ્કાર નામાંકન
૧૯૭૫	ડોગ ડે આફ્ટરનૂન				હા	સોની વોર્ટઝિક	મુખ્ય અભિનેતા માટે ઓસ્કાર નામાંકન
૧૯૭૭	બોબી ડીયરફિલ્ડ				હા	બોબી ડીયરફિલ્ડ	મુખ્ય ભૂમિકા
૧૯૭૯	એન્ડ જસ્ટિસ ફોર ઓલ				હા	આર્થર કિરકલેન્ડ	મુખ્ય અભિનેતા માટે ઓસ્કાર નામાંકન
૧૯૮૦	ક્રૂઝિંગ				હા	સ્ટીવ બર્ન્સ	મુખ્ય ભૂમિકા
૧૯૮૨	ઓથર! ઓથર!				હા	ઇવાન ટ્રેવલિયન	મુખ્ય ભૂમિકા
૧૯૮૩	સ્કારફેસ				હા	ટોની મોન્ટાના	મુખ્ય ભૂમિકા
૧૯૮૫	રેવલ્યુશન				હા	ટોમ ડોબ	મુખ્ય ભૂમિકા
૧૯૮૯	સી ઓફ લવ				હા	ડિટેક્ટિવ ફ્રેન્ક કેલર	મુખ્ય ભૂમિકા
૧૯૯૦	ડિક ટ્રેસી				હા	અલ્ફોન્સ બિગ બોય કેપ્રિસ	સહ-અભિનેતા માટે ઓસ્કાર નામાંકન
૧૯૯૦	ધ ગોડફાધર પાર્ટ ૩				હા	માઇકલ કોર્લિયોની	મુખ્ય ભૂમિકા
૧૯૯૧	ફ્રેન્કી એન્ડ જોની				હા	જોની	મુખ્ય ભૂમિકા
૧૯૯૨	ગ્લેનગેરી ગ્લેન રોસ				હા	રિચાર્ડ રોમા	સહ-અભિનેતા માટે ઓસ્કાર નામાંકન
૧૯૯૨	સેન્ટ ઓફ અ વુમન				હા	લેફ્ટનન્ટ કર્નલ ફ્રેન્ક સ્લેડ	મુખ્ય અભિનેતા માટે ઓસ્કાર વિજય
૧૯૯૩	કાર્લિટોઝ વે				હા	કાર્લિટો બ્રિગાન્ટે	મુખ્ય ભૂમિકા
૧૯૯૫	હીટ				હા	લેફ્ટનન્ટ વિન્સન્ટ હેના	મુખ્ય ભૂમિકા
૧૯૯૬	સિટી હોલ				હા	મેયર જોન પેપાસ	મુખ્ય ભૂમિકા
૧૯૯૭	ડોની બ્રાસ્કો				હા	બેન્જામિન લેફ્ટી રુગિરો	મુખ્ય ભૂમિકા
૧૯૯૭	ધ ડેવિલ્સ એડવોકેટ				હા	જોન મિલ્ટન	મુખ્ય ભૂમિકા
૧૯૯૯	ધ ઇન્સાઇડર				હા	લોવેલ બર્ગમેન	મુખ્ય ભૂમિકા
૧૯૯૯	એની ગિવન સન્ડે				હા	ટોની ડી અમાટો	મુખ્ય ભૂમિકા
૨૦૦૨	ઇન્સોમ્નિયા				હા	વિલ ડોર્મર	મુખ્ય ભૂમિકા
૨૦૦૨	સિમોન				હા	વિક્ટર ટેરેન્સકી	મુખ્ય ભૂમિકા
૨૦૦૩	ધ રિક્રુટ				હા	વોલ્ટર બર્ક	સહાયક ભૂમિકા
૨૦૦૪	ધ મર્ચન્ટ ઓફ વેનિસ				હા	શાયલોક	મુખ્ય ભૂમિકા
૨૦૦૫	ટુ ફોર ધ મની				હા	વોલ્ટર અબ્રામ્સ	મુખ્ય ભૂમિકા
૨૦૦૭	ઓશન્સ થર્ટીન				હા	વિલી બેન્ક	સહાયક ભૂમિકા
૨૦૦૭	૮૮ મિનિટ્સ				હા	ડોક્ટર જેક ગ્રેમ	મુખ્ય ભૂમિકા
૨૦૦૮	રાઇટિયસ કિલ				હા	ડિટેક્ટિવ ડેવિડ ફિસ્ક	મુખ્ય ભૂમિકા
૨૦૧૦	યૂ ડોન્ટ નો જેક				હા	જેક કેવોર્કિયન	મુખ્ય ભૂમિકા — ટેલિવિઝન ફિલ્મ
૨૦૧૧	ધ સન ઓફ નો વન				હા	ડિટેક્ટિવ ચાર્લ્સ સ્ટેનફોર્ડ	સહાયક ભૂમિકા
૨૦૧૧	જેક એન્ડ જીલ				હા	તેઓ પોતે	મહેમાન ભૂમિકા
૨૦૧૨	સ્ટેન્ડ અપ ગાઇઝ				હા	વેલ	મુખ્ય ભૂમિકા
૨૦૧૩	સાલોમે	હા		હા	હા	કિંગ હેરોડ	મુખ્ય ભૂમિકા
۲۰۱۴	મેંગલહોર્ન				હા	એ જે મેંગલહોર્ન	મુખ્ય ભૂમિકા
૨૦૧૪	ધ હમ્બલિંગ		હા		હા	સાયમન એક્સલર	મુખ્ય ભૂમિકા
૨૦૧૫	ડેની કોલિન્સ				હા	ડેની કોલિન્સ	મુખ્ય ભૂમિકા
૨૦૧૬	મિસકન્ડક્ટ				હા	ચાર્લ્સ અબ્રામ્સ	સહાયક ભૂમિકા
૨૦૧૭	હેંગમેન				હા	ડિટેક્ટિવ રે આર્ચર	મુખ્ય ભૂમિકા
૨૦૧૯	વન્સ અપોન અ ટાઇમ ઇન હોલીવુડ				હા	માર્વિન શ્વાર્ઝ	સહાયક ભૂમિકા
૨૦૧૯	ધ આઇરિશમેન				હા	જીમી હોફા	સહ-અભિનેતા માટે ઓસ્કાર નામાંકન
૨૦૨૧	હાઉસ ઓફ ગુચી				હા	આલ્ડો ગુચી	સહાયક ભૂમિકા
૨૦૨૩	નોક્સ ગોઝ અવે				હા	ઝેવિયર ક્રેન	મુખ્ય ભૂમિકા
૨૦૨૪	મોડી		હા		હા	મોરિસ ગેંગનેટ	સહાયક ભૂમિકા
૨૦૨૫	ડેડ મેન્સ વાયર				હા	એમ એલ હોલ	મુખ્ય ભૂમિકા
૨૦૨૫	ઇન ધ હેન્ડ ઓફ દાંતે				હા	અંકલ કાર્માઇન	સહાયક ભૂમિકા
૨૦૨૫	ધ રિચ્યુઅલ				હા	ફાધર થિયોફિલસ રીસિંગર	મુખ્ય ભૂમિકા

નિર્દેશક અને નિર્માતા તરીકે વિશેષ ફિલ્મો

અલ પચિનોએ અભિનેતા સિવાય ડિરેક્ટર (નિર્દેશક) અને પ્રોડ્યુસર (નિર્માતા) તરીકે પણ કેટલીક ખૂબ જ પ્રખ્યાત પ્રાયોગિક અને ડોક્યુમેન્ટરી ફિલ્મો બનાવી છે, જેની યાદી નીચે મુજબ છે:

વર્ષ	ફિલ્મ	ભૂમિકા	નોંધ
૧૯૮૯	ધ લોકલ સ્ટિગ્મેટિક	નિર્માતા અને અભિનેતા	આ એક પ્રાયોગિક ફિલ્મ હતી જેને થિયેટરમાં રિલીઝ કરવાને બદલે માત્ર ખાસ સ્ક્રીનિંગ માટે જ રાખવામાં આવી હતી.
૧૯૯૬	લુકિંગ ફોર રિચાર્ડ	નિર્દેશક, નિર્માતા અને લેખક	પચિનોની નિર્દેશક તરીકેની આ પ્રથમ સત્તાવાર ડોક્યુમેન્ટરી ફિલ્મ હતી, જેના માટે તેમને ડિરેક્ટર્સ ગિલ્ડ ઓફ અમેરિકાનો એવોર્ડ મળ્યો હતો.
૨૦૦૦	ચાઇનીઝ કોફી	નિર્દેશક અને અભિનેતા	આ એક અનોખી ડ્રામા ફિલ્મ હતી જે સંપૂર્ણ રીતે બે પાત્રો વચ્ચેની વાતચીત પર આધારિત હતી.
૨૦૧૧	વાઇલ્ડ સાલોમે	નિર્દેશક અને લેખક	ઓસ્કાર વાઇલ્ડના નાટક પર આધારિત આ એક અર્ધ-ડોક્યુમેન્ટરી (Docudrama) ફિલ્મ હતી.

પુરસ્કારો

એકેડમી (ઓસ્કર) એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
૧૯૭૩	બેસ્ટ સપોર્ટિંગ એક્ટર	ધ ગોડફાધર	નામાંકિત
૧૯૭૪	બેસ્ટ એક્ટર	સર્પિકો	નામાંકિત
૧૯૭૫	બેસ્ટ એક્ટર	ધ ગોડફાધર પાર્ટ ૨	નામાંકિત
૧૯૭૬	બેસ્ટ એક્ટર	ડોગ ડે આફ્ટરનૂન	નામાંકિત
૧૯૮૦	બેસ્ટ એક્ટર	...એન્ડ જસ્ટિસ ફોર ઓલ	નામાંકિત
૧૯૯૧	બેસ્ટ સપોર્ટિંગ એક્ટર	ડિક ટ્રેસી	નામાંકિત
૧૯૯૩	બેસ્ટ સપોર્ટિંગ એક્ટર	ગ્લેન્ગેરી ગ્લેન રોસ	નામાંકિત
	બેસ્ટ એક્ટર	સેન્ટ ઓફ અ વુમન	વિજેતા
૨૦૨૦	બેસ્ટ સપોર્ટિંગ એક્ટર	ધ આઇરિશમેન	નામાંકિત

બાફ્ટા એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
૧૯૭૩	મોસ્ટ પ્રોમિસિંગ ન્યૂકમર ટુ લીડિંગ ફિલ્મ રોલ્સ	ધ ગોડફાધર	નામાંકિત
૧૯૭૫	બેસ્ટ એક્ટર ઇન અ લીડિંગ રોલ	સર્પિકો	નામાંકિત
૧૯૭૬	બેસ્ટ એક્ટર ઇન અ લીડિંગ રોલ	ડોગ ડે આફ્ટરનૂન / ધ ગોડફાધર પાર્ટ ૨	વિજેતા
૧૯૯૧	બેસ્ટ એક્ટર ઇન અ સપોર્ટિંગ રોલ	ડિક ટ્રેસી	નામાંકિત
૨૦૨૦	બેસ્ટ એક્ટર ઇન અ સપોર્ટિંગ રોલ	ધ આઇરિશમેન	નામાંકિત

એમી એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
rowspan=2 | ૨૦૦૪	આઉટસ્ટેન્ડિંગ લીડ એક્ટર ઇન અ મિનિસિરીઝ ઓર મૂવી	એન્જલ્સ ઇન અમેરિકા	વિજેતા
૨૦૧૦		યુ ડોન્ટ નો જેક	વિજેતા
૨૦૧૩		ફિલ સ્પેક્ટર	નામાંકિત

ગોલ્ડન ગ્લોબ એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
૧૯૭૩	બેસ્ટ એક્ટર ઇન અ મોશન પિક્ચર – ડ્રામા	ધ ગોડફાધર	નામાંકિત
૧૯૭૪	બેસ્ટ એક્ટર ઇન અ મોશન પિક્ચર – ડ્રામા	સર્પિકો	વિજેતા
૧૯૭૫	બેસ્ટ એક્ટર ઇન અ મોશન પિક્ચર – ડ્રામા	ધ ગોડફાધર પાર્ટ ૨	નામાંકિત
૧૯૭૬	બેસ્ટ એક્ટર ઇન અ મોશન પિક્ચર – ડ્રામા	ડોગ ડે આફ્ટરનૂન	નામાંકિત
૧૯૭૮	બેસ્ટ એક્ટર ઇન અ મોશન પિક્ચર – ડ્રામા	બોબી ડિયરફિલ્ડ	નામાંકિત
૧૯૮૦	બેસ્ટ એક્ટર ઇન અ મોશન પિક્ચર – ડ્રામા	...એન્ડ જસ્ટિસ ફોર ઓલ	નામાંકિત
૧૯૮૩	બેસ્ટ એક્ટર ઇન અ મોશન પિક્ચર – મ્યુઝિકલ ઓર કોમેડી	ઑથર! ઑથર!	નામાંકિત
૧૯૮૪	બેસ્ટ એક્ટર ઇન અ મોશન પિક્ચર – ડ્રામા	સ્કારફેસ	નામાંકિત
૧૯૯૦	બેસ્ટ એક્ટર ઇન અ મોશન પિક્ચર – ડ્રામા	સી ઓફ લવ	નામાંકિત
૧૯૯૧	બેસ્ટ સપોર્ટિંગ એક્ટર – મોશન પિક્ચર	ડિક ટ્રેસી	નામાંકિત
	બેસ્ટ એક્ટર ઇન અ મોશન પિક્ચર – ડ્રામા	ધ ગોડફાધર પાર્ટ ૩	નામાંકિત
૧૯૯૩	બેસ્ટ સપોર્ટિંગ એક્ટર – મોશન પિક્ચર	ગ્લેન્ગેરી ગ્લેન રોસ	નામાંકિત
	બેસ્ટ એક્ટર ઇન અ મોશન પિક્ચર – ડ્રામા	સેન્ટ ઓફ અ વુમન	વિજેતા
૨૦૦૧	સેસિલ બી. ડીમિલ એવોર્ડ	—	વિજેતા
૨૦૦૪	બેસ્ટ એક્ટર ઇન અ મિનિસિરીઝ ઓર મોશન પિક્ચર – ટેલિવિઝન	એન્જલ્સ ઇન અમેરિકા	વિજેતા
૨૦૧૧	બેસ્ટ એક્ટર ઇન અ મિનિસિરીઝ ઓર મોશન પિક્ચર – ટેલિવિઝન	યુ ડોન્ટ નો જેક	વિજેતા
૨૦૧૪	બેસ્ટ એક્ટર ઇન અ મિનિસિરીઝ ઓર મોશન પિક્ચર – ટેલિવિઝન	ફિલ સ્પેક્ટર	નામાંકિત
૨૦૧૬	બેસ્ટ એક્ટર ઇન અ મોશન પિક્ચર – મ્યુઝિકલ ઓર કોમેડી	ડેની કોલિન્સ	નામાંકિત
૨૦૨૦	બેસ્ટ સપોર્ટિંગ એક્ટર – મોશન પિક્ચર	ધ આઇરિશમેન	નામાંકિત
૨૦૨૧	બેસ્ટ એક્ટર ઇન અ ટેલિવિઝન સિરીઝ – ડ્રામા	હન્ટર્સ	નામાંકિત

ગ્રેમી એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
૨૦૦૧	બેસ્ટ સ્પોકન વર્ડ આલ્બમ	ધ કમ્પ્લીટ શેક્સપિયર સોનેટ્સ	નામાંકિત

સ્ક્રીન એક્ટર્સ ગિલ્ડ એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
૨૦૦૪	આઉટસ્ટેન્ડિંગ મેલ એક્ટર ઇન અ મિનિસિરીઝ ઓર ટેલિવિઝન મૂવી	એન્જલ્સ ઇન અમેરિકા	વિજેતા
૨૦૧૧	આઉટસ્ટેન્ડિંગ મેલ એક્ટર ઇન અ મિનિસિરીઝ ઓર ટેલિવિઝન મૂવી	યુ ડોન્ટ નો જેક	વિજેતા
૨૦૧૪	આઉટસ્ટેન્ડિંગ મેલ એક્ટર ઇન અ મિનિસિરીઝ ઓર ટેલિવિઝન મૂવી	ફિલ સ્પેક્ટર	નામાંકિત
૨૦૨૦	આઉટસ્ટેન્ડિંગ મેલ એક્ટર ઇન અ સપોર્ટિંગ રોલ	ધ આઇરિશમેન	નામાંકિત
	આઉટસ્ટેન્ડિંગ કાસ્ટ ઇન અ મોશન પિક્ચર	ધ આઇરિશમેન	નામાંકિત
	આઉટસ્ટેન્ડિંગ કાસ્ટ ઇન અ મોશન પિક્ચર	વન્સ અપોન અ ટાઇમ ઇન હોલીવુડ	નામાંકિત
૨૦૨૨	આઉટસ્ટેન્ડિંગ કાસ્ટ ઇન અ મોશન પિક્ચર	હાઉસ ઓફ ગુચી	નામાંકિત

ટોની એવોર્ડ્સ

વર્ષ	કેટેગરી	નામાંકિત કૃતિ	પરિણામ	સંદર્ભ
૧૯૬૯	બેસ્ટ સપોર્ટિંગ ઓર ફીચર્ડ એક્ટર ઇન અ પ્લે	ડઝ અ ટાઇગર વેર અ નેકટાઇ?	વિજેતા
૧૯૭૭	બેસ્ટ લીડિંગ એક્ટર ઇન અ પ્લે	ધ બેઝિક ટ્રેનિંગ ઓફ પાવલો હમેલ	વિજેતા
૨૦૧૧	બેસ્ટ લીડિંગ એક્ટર ઇન અ પ્લે	ધ મર્ચન્ટ ઓફ વેનિસ	નામાંકિત

બાહ્ય કડીઓ

• અલ પચિનો, ઇન્ટરનેટ મૂવી ડેટાબેઝ પર