ઉવએસપદ

ઉવએસપદ (સંસ્કૃત: ઉપદેશપદ) પ્રાકૃતભાષામાં આઠમી સદીમાં રચાયેલ એક ઉપદેશલક્ષી કૃતિ છે. ૧૦૩૯ ગાથાઓમાં રચાયેલ આ કૃતિની રચના જૈન આચાર્ય હરિભદ્રસૂરિએ કરી છે.

લેખન

આ કૃતિમાં ૧૦૩૯ ગાથાઓ છે જેમાં ૭૦ લઘુકથાઓને મનોરંજક શૈલીમાં રજૂ કરવામાં આવી છે. ઉવએસપદની ૩ કથાઓ ઘટનાપ્રધાન, ૧૯ કથાઓ ચરિત્રપ્રધાન, ૨ કથાઓ વ્યંગપ્રધાન, ૯ કથાઓ બુદ્ધિપ્રધાન, ૫ કથાઓ મનોરંજનપ્રધાન તથા અન્ય ૫ કથાઓ ભાવના-વૃત્તિપ્રધાન છે.

ટીકા

આ કૃતિ ઉપર મુનિ ચન્દ્રસૂરિએ વિ.સં. ૧૧૭૪માં ‘સુખબોધિની’ નામની ટીકાની રચના કરી છે જેમાં તેમણે ઉવએસપદની મૂળ કથાઓનો વિસ્તાર કર્યો છે. મુક્તિકમલ જૈન મોહનલાલ દ્વારા વડોદરાએ આ ઉપદેશપદ ટીકા સહિત સંવત ૧૯૨૩ અને ૧૯૨૫માં એમ બે ભાગમાં પ્રકાશિત કરેલું છે.