એષા દાદાવાળા

એષા દાદાવાળા
જન્મ	એષા મયંક દાદાવાળા (1985-01-02) 2 January 1985 સુરત, ગુજરાત
વ્યવસાય	કવિયત્રી, પત્રકાર
ભાષા	ગુજરાતી
રાષ્ટ્રીયતા	ભારતીય
શિક્ષણ	બેચલર ઓફ આર્ટ્સ
માતૃ શિક્ષણ સંસ્થા	વીર નર્મદ દક્ષિણ ગુજરાત યુનિવર્સિટી, સુરત
લેખન પ્રકારો	મુક્ત પદો, ગીત
નોંધપાત્ર સર્જનો	વરતારો (૨૦૦૮) જન્મારો (૨૦૧૩)
નોંધપાત્ર પુરસ્કારો	રવજી પટેલ પુરસ્કાર યુવા ગૌરવ પુરસ્કાર (૨૦૧૩) યુવા પુરસ્કાર (૨૦૧૮)
સક્રિય વર્ષો	૨૦૦૨ - હાલ પર્યંત

એષા દાદાવાળા ગુજરાત, ભારતની ગુજરાતી કવિયત્રી અને પત્રકાર છે. તેણીના મહત્વના સર્જન વરતારો (૨૦૦૮), ક્યાં ગઇ એ છોકરી (૨૦૧૧) અને જન્મારો (૨૦૧૩) છે. ૨૦૧૩માં તેણીને ગુજરાતી સાહિત્યમાં યોગદાન માટે યુવા ગૌરવ પુરસ્કાર પ્રાપ્ત થયો હતો.

પ્રારંભિક જીવન

એષાનો જન્મ ૨ જાન્યુઆરી ૧૯૮૫ના રોજ સુરતમાં મયંક અને હેતલ દાદાવાળાને ત્યાં થયો હતો. તેણીએ ૨૦૦૨માં જીવન ભારતી શાળા, સુરત ખાતે શાળાકીય શિક્ષણ મેળવ્યું. ૨૦૦૫માં વીર નર્મદ દક્ષિણ ગુજરાત યુનિવર્સિટીમાંથી તેણીએ બેચલર ઓફ આર્ટ્સની પદવી મેળવી હતી.

કારકિર્દી

તેણી જ્યારે શાળામાં હતી ત્યારે તેણીની પ્રથમ કવિતા, ડેથ સર્ટિફિકેટ, ગુજરાતી કાવ્ય સામયિક કવિતામાં પ્રકાશિત થઇ હતી. હાલમાં તેણી સીટી ભાસ્કરના ડેપ્યુટી ન્યૂઝ એડિટર તરીકે દિવ્ય ભાસ્કરમાં ૨૦૧૨થી કામ કરી રહી છે. પહેલાં તેણીએ સમાચાર વાચક, પત્રકાર અને સહ-સંપાદક તરીકે વિવિધ ગુજરાતી મિડિયામાં કામ કર્યું હતું, જેમાં ગુજરાત મિત્ર, માય ટીવી (સુરતની સ્થાનિક સમાચાર ચેનલ), ધબકાર (સુરતનું સ્થાનિક સમાચારપત્ર), સંદેશ, માય એફએમ અને ગુજરાત ગાર્ડિયનનો સમાવેશ થાય છે. તેણીની ટૂંકી વાર્તાઓ ચિત્રલેખા સહિત ઘણાં ગુજરાતી સામયિકોમાં પ્રકાશિત થઇ છે.

સર્જન

વરતારો, તેણીનો ૨૦૦૮માં પ્રગટ થયેલો પ્રથમ કાવ્ય સંગ્રહ છે, જેના પછી જન્મારો ૨૦૧૩માં પ્રકાશિત થયો હતો. તેણીએ સ્ત્રીની લાગણીઓ અને સ્ત્રી જીવનના વિવિધ તબક્કાઓનું વર્ણન કર્યું છે. ક્યાં ગઇ એ છોકરી (૨૦૧૧) એ ડાયરી સ્વરૂપે લખાયેલી નવલકથા છે.

પુરસ્કાર

ગુજરાતી સાહિત્યમાં યોગદાન બદલ ગુજરાત સાહિત્ય અકાદમી તરફથી તેણીને ૨૦૧૩માં યુવા ગૌરવ પુરસ્કાર પ્રાપ્ત થયો હતો. ગુજરાત સાહિત્ય અકાદમી તરફથી તેણીના પુસ્તક જન્મારો (૨૦૧૩)ને શ્રેષ્ઠ કવિતા સંગ્રહનો પુરસ્કાર મળ્યો હતો. તેણીને ગુજરાત સમાચાર અને સમન્વય તરફથી અપાતો રવજી પટેલ પુરસ્કાર; કવિ ગની દહીંવાલા પુરસ્કાર (૨૦૦૦); કોફી મેટ્સ, મુંબઈ તરફથી શ્રેષ્ઠ કવિ પુરસ્કાર; કલા ગુર્જરી સંસ્થા તરફથી શ્રેષ્ઠ કવિ પુરસ્કાર (૨૦૦૫); રાષ્ટ્રીય કલા કેન્દ્ર, સુરત તરફથી શ્રેષ્ઠ કવિ સુરત પુરસ્કાર (૨૦૦૯) મળ્યાં છે. ઈ.સ. ૨૦૧૮માં જન્મારો માટે તેમને યુવા પુરસ્કાર પ્રાપ્ત થયો હતો.