થાઇલેન્ડમાં પ્રવાસન

વાટ અરુણ, બેંગકોક થાઇલેન્ડના સૌથી જાણીતા સીમાચિહ્નોમાંનું એક છે.

પ્રવાસન થાઇલેન્ડમાં આર્થિક ફાળો આપે છે અને તેની આવકનો અંદાજ ૧ લાખ કરોડ બાહટ (૨૦૧૩) થી ૨.૫૩ લાખ કરોડ બાહટ (૨૦૧૬) જેટલો છે. આ આવક થાઇલેન્ડની ૧૨ લાખ કરોડ બાહટ જીડીપીના ૯% થી ૧૭.૭% ની સમકક્ષ છે. પરોક્ષ મુસાફરી અને પ્રવાસન આવકની સાથે વખતે ૨૦૧૪ની કુલ થાઇલેન્ડના જીડીપીના ૧૯.૩% (૨.૩ ટ્રિલિયન બાહટ)ની સમકક્ષ હોવાનો અંદાજ છે. રાષ્ટ્રીય આર્થિક અને સામાજિક વિકાસ પરિષદના કાર્યાલયના મહાસચિવના જણાવ્યા અનુસાર, અંદાજો સૂચવે છે કે પ્રવાસન ક્ષેત્ર ૨૦૩૦ સુધીમાં જીડીપીના ૩૦% જેટલું હશે, જે ૨૦૧૯ માં ૨૦% હતું, અને થાઇલેન્ડને ૨૦૨૭માં ૮ કરોડ મુલાકાતીઓ પ્રાપ્ત થવાની અપેક્ષા છે.

૨૦૧૭માં વિશ્વભરમાં પ્રવાસન વૈશ્વિક જીડીપીના ૧૦.૪% અને ૩૧૩ મિલિયન નોકરીઓ, અથવા કુલ રોજગારના ૯.૯% હિસ્સો ધરાવે છે. મોટાભાગની સરકારો પ્રવાસનને સરળ નાણાં કમાવનાર અને આર્થિક વિકાસના ટૂંકા માર્ગ તરીકે જુએ છે. પ્રવાસનની સફળતાને મુલાકાતીઓની સંખ્યા દ્વારા માપવામાં આવે છે.

કોવિડ-૧૯ રોગચાળા પહેલાં સંયુક્ત રાષ્ટ્ર વિશ્વ પ્રવાસન સંગઠન દ્વારા સંકલિત વિશ્વ પ્રવાસન રેન્કિંગ વડે થાઇલેન્ડને વિશ્વના આઠમા સૌથી વધુ મુલાકાત લેવાયેલા દેશમાં સ્થાન આપવામાં આવ્યું હતું. ૨૦૧૯માં થાઇલેન્ડમાં ૩.૯૮ કરોડ આંતરરાષ્ટ્રીય પ્રવાસીઓ આવ્યા હતા, જે યુનાઇટેડ કિંગડમ અને જર્મની કરતાં વધારે હતા. થાઇલેન્ડે ૬૦.૫ અબજ યુએસ ડોલરની આંતરરાષ્ટ્રીય પ્રવાસન કમાણી પ્રાપ્ત કરી જે વિશ્વમાં ચોથા સ્તરે હતી. કોવિડ-૧૯ મહામારી પછી પ્રવાસન ફરી એક વખત સમાન સ્તરે પહોંચ્યું છે. વર્ષ ૨૦૨૪માં આંતરરાષ્ટ્રીય પ્રવાસીઓની સંખ્યા ૩.૯૮ કરોડ થવાની ધારણા હતી. જો કે, તે વર્ષે થાઇલેન્ડે માત્ર ૩.૫૫ કરોડ આંતરરાષ્ટ્રીય પ્રવાસીઓને આકર્ષ્યા હતા.

વાર્ષિક પ્રવાસીઓની સંખ્યા (૧૦ લાખમાં)

ઝાંખી

ફ્રા નાખોન ખિરી ઐતિહાસિક ઉદ્યાન, ફેટચાબુરી ખાતે થતી આતશબાજી

૧૯૬૦ના દાયકામાં પ્રવાસનમાં વૃદ્ધિના કારણોમાં સ્થિર રાજકીય વાતાવરણ અને આંતરરાષ્ટ્રીય હવાઈ પરિવહનના એક લેયઓવર એરપોર્ટ તરીકે બેંગકોકનો વિકાસ સામેલ હતો. પ્રવાસીઓની માંગને કારણે હોટેલ ઉદ્યોગ અને છૂટક ઉદ્યોગ બંને ઝડપથી વિસ્તર્યા હતા. ૧૯૬૦ના દાયકામાં આરામ અને પુનઃપ્રાપ્તિ માટે વિયેતનામના યુદ્ધથી આવેલા અમેરિકન સૈનિકોની હાજરીને કારણે તેને પ્રોત્સાહન મળ્યું હતું. આ સમય દરમિયાન, આંતરરાષ્ટ્રીય પ્રવાસનનો નવો ચીલો ચિતરાઇ રહ્યો કારણ કે સમગ્ર વિશ્વમાં જીવનધોરણમાં વધારો થયો હતો અને હવાઈ પરિવહન ક્ષેત્રમાં નવી તકનીકની રજૂઆત સાથે મુસાફરી ઝડપી અને વધુ ભરોસાપાત્ર બની હતી.

૧૯૬૭માં ૩૩૬,૦૦૦ વિદેશી મુલાકાતીઓ અને ૫૪,૦૦૦ સૈનિકોએ મુલાકાત કરી હતી. ૨૦૧૬માં થાઇલેન્ડની મુલાકાત લેનારા વિદેશી મહેમાનોની સંખ્યા વધીને ૩.૨૫ કરોડ થઈ ગઈ છે.

ડોનાલ્ડ ડકની ખાડી, કો સિમિલન

સેક્સ ટૂરિઝમ

૨૦૧૪માં થાઇલેન્ડની પ્રથમ મહિલા પ્રવાસન મંત્રી તરીકે નિયુક્ત કોબકાર્ન વટ્ટાનાવરંગકુલએ થાઇલેન્ડના સેક્સ ઉદ્યોગને નાબૂદ કરવાની પ્રતિજ્ઞા લીધી છે. "અમે ઈચ્છીએ છીએ કે થાઇલેન્ડ ગુણવત્તાયુક્ત પ્રવાસન વિશે હોય. અમે ઈચ્છીયે છીએ કે સેક્સ ઉદ્યોગ બંધ થાય", એમ કોબકર્ને રોઇટર્સને જણાવ્યું હતું. "પ્રવાસીઓ સેક્સ માટે થાઇલેન્ડ આવતા નથી. તેઓ અહીં આપણી સુંદર સંસ્કૃતિ માટે આવે છે". તેમણે સફાઈ અભિયાનમાં હજારો બાર, વેશ્યાગૃહ અને મસાજ પાર્લરો સાથે પટાયાનું નામ રાખ્યું છે, જે તેમનો "પાયલોટ પ્રોજેક્ટ" છે. નવેમ્બર ૨૦૧૭માં કોબકાર્નને પ્રવાસન મંત્રી તરીકે બદલવામાં આવ્યા હતા.

૨૧ ફેબ્રુઆરી ૨૦૧૭ના રોજ, વડા પ્રધાન જનરલ પ્રયુત ચાન-ઓ-ચા જાહેરાત કરી હતી કે તેઓ પોલીસને પટાયાના સેક્સ ઉદ્યોગને નાબૂદ કરવાનો આદેશ આપશે.

હાથી પ્રવાસન

દાયકાઓથી થાઇલેન્ડમાં હાથીઓ પર ટ્રેકિંગ પ્રવાસીઓ માટે આકર્ષણનું કેન્દ્ર રહી છે. ૧૯૮૯માં થાઇલેન્ડમાં લાકડીઓ કાપવાના ઉદ્યોગ પર પ્રતિબંધ મૂકવામાં આવ્યો હતો. પછી પ્રવાસીઓ માટે શો કરવા અને તેમને સવારી આપવા માટે હાથીઓને શિબિરોમાં લાવવામાં આવ્યા હતા. આમાંના મોટાભાગના હાથીઓ એક સમયે લાકડા કાપવાના ઉદ્યોગમાં કામ કરતા હતા. દેશમાં પ્રવાસનમાં વધારો થયા પછી હાથીઓની માંગ ફરી શરૂ થઈ. પ્રવાસનની તેજીએ હાથીઓને કામ કરવા અને તેમની સંભાળ રાખવા માટે જગ્યા આપી હતી. આજે દેશમાં અંદાજે ૩૫૦૦ થી ૪૦૦૦ પાળેલા હાથીઓ છે.

રમતગમત પ્રવાસન

"અમેઝિંગ થાઇલેન્ડ"-ટ્રાવેલ એન્ડ ટૂર એક્સ્પોમાં થાઇલેન્ડ પ્રવાસન મથક

મય થાઈ એ થાઇલેન્ડની રાષ્ટ્રીય રમત છે અને 'આઠ અંગોનું વિજ્ઞાન' જોવા માટે સ્ટેડિયમની સફર ઘણા પ્રવાસીઓ માટે એક આવશ્યક અનુભવ છે. મુએ થાઈનો અભ્યાસ કરવો એ થાઈ રમતગમત પ્રવાસન માટેની મુખ્ય પ્રવૃત્તિ છે, જેને સરકાર પ્રોત્સાહન આપે છે.