નિશા ચૌધરી

નિશા ચૌધરી
સંસદ સભ્ય
પદ પર ૧૯૯૬ – ૨૦૦૧ (અવસાન)
બેઠક	સાબરકાંઠા
અંગત વિગતો
જન્મ	(1952-09-10)૧૦ સપ્ટેમ્બર ૧૯૫૨
રાષ્ટ્રીયતા	ભારતીય
રાજકીય પક્ષ	ભારતીય રાષ્ટ્રીય કોંગ્રેસ
જીવનસાથી	અમરસિંહ ચૌધરી
નિવાસસ્થાન	નવી દિલ્હી
ક્ષેત્ર	શિક્ષક, રમતવીર, રાજકારણી, સામાજિક કાર્યકર, શિક્ષણવિદ

નિશા ચૌધરી (૧૯૫૨-૨૦૦૧) એક સામાજિક અને રાજકીય કાર્યકર હતા અને ૧૯૯૦ના દાયકામાં ભારતીય રાષ્ટ્રીય કોંગ્રેસના ઉમેદવાર તરીકે ત્રણ વખત ભારતના ગુજરાત રાજ્યના સાબરકાંઠા મતવિસ્તારમાંથી લોકસભામાં ચૂંટાયા હતા.

અંગત જીવન

તેમનો જન્મ ૧૦ સપ્ટેમ્બર ૧૯૫૨ના રોજ રાજસ્થાન રાજ્યના ડુંગરપુર જિલ્લાના સકલવાડા ખાતે નિશા ગામેતી તરીકે થયો હતો. તેમણે ૧૯૯૦માં તેમના પતિ સાથે છૂટાછેડા લીધા હતા, જેમની સાથે તેમને બે બાળકો હતા. ૧૯૮૦ના દાયકાના અંતમાં તેઓ ભૂતપૂર્વ મુખ્યમંત્રી અમરસિંહ ચૌધરીની સાથી હતી. આ દંપતીએ ૧૩ જુલાઈ ૧૯૯૧ના રોજ લગ્ન કર્યા. આ લગ્ન વિવાદનું કારણ બન્યા કારણ કે અમરસિંહ ચૌધરીની પહેલી પત્ની ગજરાબેન સાથે લગ્ન થયેલા હતા, જેમની સાથે તેમને ૩ બાળકો હતા. નિશા ચૌધરી ૧૯૯૬, ૧૯૯૮ અને ૧૯૯૯માં લોકસભામાં ચૂંટાઈ આવ્યા હતા, અને ૨૦૦૧માં લોકસભા સભ્ય તરીકેના કાર્યકાળ દરમિયાન તેમનું અવસાન થયું હતું.

શિક્ષણ અને રુચિઓ

નિશા ચૌધરીએ સમાજશાસ્ત્રમાં એમ.એ. કર્યું હતું. તેણીએ બિરલા ઇન્સ્ટિટ્યૂટ, પિલાની અને રાજસ્થાન યુનિવર્સિટી, જયપુરમાંથી શિક્ષણ મેળવ્યું હતું. તેણીના શોખમાં ગાયન, સંગીત અને શાસ્ત્રીય નૃત્યનો સમાવેશ થતો હતો. તેણી એક રમતવીર હતી અને તેણીએ હોકી, ટેનિસ અને બેડમિન્ટન જેવી અનેક રમતોમાં ભાગ લીધો હતો. તેણી રાષ્ટ્રીય કેડેટ કોર્પ્સની સભ્ય પણ હતી અને ઘણા વર્ષો સુધી નવી દિલ્હીમાં પ્રજાસત્તાક દિવસના કન્ટીજન્ટ કેમ્પમાં પણ હાજરી આપી હતી.

કારકિર્દી

નિશા ચૌધરીએ ઓલ ઈન્ડિયા રેડિયો, જયપુરમાં રેડિયો કલાકાર તરીકે કામ કર્યું હતું. રાજ્ય સમાજ કલ્યાણ સલાહકાર બોર્ડના અધ્યક્ષ તરીકે, મહિલા અને બાળ કલ્યાણ અને પછાત વર્ગો, ખાસ કરીને આદિવાસીઓના વિકાસ માટે કામ કર્યું હતું. તેણીની સમગ્ર કારકિર્દી દરમિયાન તેણી અનેક સામાજિક અને શૈક્ષણિક સંસ્થાઓ સાથે સંકળાયેલી રહી છે અને વંચિતો માટે કામ કર્યું હતું.

૨૦૦૧માં તેણીનું અવસાન થયું હતું.