મેના ગુર્જરી (ગુજરાતી ચલચિત્ર)

મેના ગુર્જરી
દિગ્દર્શક	દિનેશ રાવલ
નિર્માતા	પૂનમભાઈ સી. પટેલ
કલાકારો	મલ્લિકા સારાભાઈ, રાજીવ, રમેશ મહેતા, મંજરી દેસાઈ, અરવિંદ પંડ્યા
સંગીત	દિલિપ ધોળકિયા
નિર્માણ	લક્ષ્મી સ્ટુડીયો, વડોદરા
રજૂઆત તારીખ	૩૦ ઓગસ્ટ ૧૯૭૫
અવધિ	૧૨૯ મિનિટ્સ
દેશ	ભારત
ભાષા	ગુજરાતી

મેના ગુર્જરી એ ૧૯૭૫ના વર્ષમાં રજૂ થયેલું ગુજરાતી ચલચિત્ર છે. ચલચિત્રમાં દર્શાવાયેલ સેન્સર બોર્ડના પ્રમાણપત્રમાં પ્રમાણપત્ર આપ્યાની તારીખ ૩૦ ઓગસ્ટ ૧૯૭૫ દર્શાવાયેલી છે.

કલાકાર

આ ગુજરાતી ચલચિત્રમાં મેનાનાં પાત્રમાં મુખ્યકલાકાર તરીકે મલ્લિકા સારાભાઈએ ભુમિકા નિભાવેલી છે. એમની સાથે રાજીવ છે. અન્ય પાત્રો તરીકે ડો. અરૂણ દેસાઈ, લક્ષ્મી પટેલ, ચાંપશીભાઈ નાગડા, રમેશ મહેતા, અરવિંદ પંડ્યા, પી. ખરસાણી, મંજરી દેસાઈ, ઈન્દુમતી રાજડા, દેવયાની, બાબલો, સુરેશ રાવલ, લીલાબેન શાહ, વંદના, શર્મિસ્ઠા અને મુકુંદ પંડ્યા છે. મહેમાન કલાકાર તરીકે જોગેન કુમાર છે.

કથા-પટકથા રામજીભાઈ વાણીયા દ્વારા લખાયેલી છે. ધ્વનિ-મુદ્રણ જી.કે. મહેતા દ્વારા કરવામાં આવ્યુ છે.

પાર્શ્વગાયકો તરીકે ઉષા મંગેશકર, દિલિપ ધોળકિયા, દિલરાજ કૌર, એ.આર. ઓઝા, ઉષા રેગે, અને આનંદકુમાર સી.એ અવાજ આપ્યો છે. સંગીતનિર્માણ દીલીપ ધોળકીયાએ કર્યું છે.

ચલચિત્રના નિર્માતા પૂનમભાઈ સી. પટેલ અને દિગદર્શક તરીકે દિનેશ રાવલે કામ કર્યુ છે.

કથાનક

ચલચિત્રના શરુઆતના ભાગમાં દર્શાવ્યા પ્રમાણે આ ચલચિત્ર એક ગુજરાતી લોકવાર્તા પર આધારીત છે.

મેના, મેરુ ભા ની દિકરી, નાનપણથી જ બહાદુર છે. મેરુ ભા પોતાની પત્ની અવસાન પામી હોવા છતાં મેનાના ઉછેરમાં કોઇ કચાશ ન રહી જાય એ માટે અનેક લોકોનો એ માટે આગ્રગ હોવા છતા બીજા લગ્ન નથી કરવા ઇચ્છતા.

એકવખત બાળક મેનાને એ વેલડામાં સુવાડીને કોઈ પરીચિતને મળવા ગયા હોય છે ત્યારે ગાડાવાળો આવીને ખબર આપે છે કે મેના વેલડાંમાં નથી. ખૂબ શોઘ્યા પછી એ પાવાગઢ પર્વતની ટોચે આવેલા મંદિરમાં માતાજી સમક્ષ મળી આવે છે.

મોટી થયા પછી મેના કોઇ પણ અન્યાય સામે પોતાનો અવાજ ઉઠાવે છે. એ મુખીના વાસના ભૂખ્યા દિકરા પાઠ ભણાવે છે અને મુખીની દિકરી પર નજર બગાડનારા લુટારાઓને પણ પાઠ ભણાવે છે.

એના લગ્ન ગોકુળગઢના કુંવર ચંદાજી ઠાકોર સાથે થાય છે. એક વખત ગોરસ વેચવા જતા રસ્તામાં એમને સુલતાનની છાવણી આવે છે. સિપાહીઓ મેનાને અને એની સખીઓને ગોરસ વેચાતું આપવા માટે વિનંતિ કરે છે. એ વિનંતિ મેના અને સખીઓ મંજુર પણ રાખે છે. પણ આ રીતે ગોરસ વેચવા જતા એક વખત સુલતાનના કામાતુર દિકરાની નજર મેના પર પડે છે અને મેના પ્રત્યે આકર્ષીત થવાને કારણે એ મેના ને લગ્ન કરવા આગ્રહ કરે છે, પરંતુ જવાબમાં મેનાના મેણા સાંભળી ગુસ્સે થવાના કારણે મેનાને કેદ કરી લે છે. એ પછી ચંદાજી પોતાની ચતુરાઈ અને બહાદુરી થી મેના ને સુલ્તાનના દિકારાની ચુંગાલમાંથી છોડાવે છે.

ગીતોની યાદી

મેના ગુર્જરી ચલચિત્રનાં ગીતોની યાદી

ક્રમ	ગીતના શબ્દો	ગાયક કલાકારો	ગીતકાર
૧	"એ રણચંડી દુર્ગા ચામુંડા, સાથિયા પુરાવો દ્વારે" યુટ્યુબ પર	આનંદકુમાર સી અને ઉષા મંગેશકર	રમેશ ગુપ્તા
૨	"જય જય માડી જગદંબે મહાકાળી" યુટ્યુબ પર	સમુહ ગીત	રમેશ ગુપ્તા
૩	"અરધી રાતલડીએ મને રે જગાડી, છંછેડી મન વિણાના તાર આ તે કોણ રે" યુટ્યુબ પર	લતા મંગેશકર અને દિલિપ ધોળકિયા	રમેશ ગુપ્તા
૪	"ચુંદડી ઓઢાડી મને જશોદાના કાન તે તો ઘેલી કરી" યુટ્યુબ પર	ઊષા મંગેશકર	રમેશ ગુપ્તા
૫	"ઈતના ગુસ્સા કાહે ગોરી, હું તો પ્રેમ દિવાનો"	આનંદકુમાર સી, પુષ્પા, ઉષા રેગે	રમેશ ગુપ્તા
૬	"ગોરસ લ્યો કોઈ ગોરસ લ્યો" યુટ્યુબ પર	ઉષા મંગેશકર અને સાથીઓ	રમેશ ગુપ્તા
૭	"ધન્ના ધતુડી પતુડી" યુટ્યુબ પર	દીલરાજ કૌર અને એ આર ઓઝા	રમેશ ગુપ્તા