લાલો – કૃષ્ણ સદા સહાયતે

લાલો – કૃષ્ણ સદા સહાયતતે એ અંકિત સખિયા નિર્દેશિત ૨૦૨૫માં પ્રદર્શિત થયેલું ગુજરાતી ચલચિત્ર છે. તેની પટકથા કૃષ્ણ વાજા, વિકી પૂર્ણિમા અને અંકિત સખિયાએ લખી છે. ચલચિત્રમાં રીવા રાચ, શ્રુહાદ ગોસ્વામી, કરણ જોશી, મિષ્ટી કાડેચા સહિતના કલાકારો મુખ્ય ભૂમિકામાં છે.

માનસી પારેખ, પાર્થિવ ગોહિલ, મેનિફેસ્ટ ફિલ્મ્સ એન્ડ જય વ્યાસ પ્રોડક્શન્સ અને અજય બલવંત પડારિયાએ આ ચલચિત્રનું નિર્માણ કર્યું છે. આર. ડી. બ્રધર્સ મૂવીઝ, સોલ સૂત્ર, નીમ ટ્રી એન્ટરટેઇનમેન્ટ અને દેવરાજ ડુબારિયાએ સહ-નિર્માતા તરીકેની ભૂમિકા ભજવી છે. આ ચલચિત્ર ૧૦ ઓક્ટોબર ૨૦૨૫ના દિવસે જાહેર જનતા માટે સિનેમાઘરોમાં પ્રદર્શિત કરવામાં આવ્યું હતું.

કલાકારો

• રીવા રાચ્છ
• શ્રુહાદ ગોસ્વામી
• કરણ જોષી
• મિસ્ટી કદેચા
• અંશુ જોષી
• કિન્નલ નાયક
• પારુલ રાજ્યગુરુ
• જયદીપ ટિમાણીયા

વાર્તા

ફાર્મહાઉસમાં અટવાયેલો એક રિક્ષાચાલક પોતાના ભૂતકાળના પડકારોનો સામનો કરે છે. આ દરમિયાન તે ભગવાન કૃષ્ણના દિવ્ય દર્શનનો અનુભવ કરે છે, જે તેને સ્વ-શોધ અને માનસિક ઉપચાર તરફની એક બદલાવ લાવનારી યાત્રા માટે માર્ગદર્શન આપે છે.

ફિલ્મની વાર્તાનું કેન્દ્રબિંદુ 'લાલો' નામનો એક ગરીબ રિક્ષાચાલક છે, જે તેના ભૂતકાળના કોઈ દુઃખદ બોજ સાથે જીવન જીવી રહ્યો છે. સરળતાથી પૈસા કમાવવાની લાલચમાં તે એક સૂમસામ અને ભૂતિયા ફાર્મહાઉસમાં ફસાઈ જાય છે. આ એકલતા અને નિરાશાની ક્ષણોમાં તેના જીવનમાં ભગવાન શ્રી કૃષ્ણનું આગમન થાય છે જે તેના માટે એક મિત્ર, માર્ગદર્શક અને વિચાર પ્રતિક તરીકે ઉભરી આવે છે. આ ફાર્મહાઉસ લાલાના પોતાના મનનું પ્રતિબિંબ બની જાય છે, જ્યાં તે શ્રી કૃષ્ણના દર્શન અને માર્ગદર્શન દ્વારા પોતાના આંતરિક દુઃખ, અપરાધભાવ અને જીવનની કઠોર વાસ્તવિકતાઓનો સામનો કરવાનું શરૂ કરે છે. આ સફર તેને આત્મ-શોધ અને આંતરિક શાંતિ તરફ દોરી જાય છે. આ ફિલ્મ માત્ર એક વ્યક્તિની આધ્યાત્મિક યાત્રા જ નથી, પરંતુ તે ગહન પારિવારિક અને સામાજિક મુદ્દાઓને પણ સ્પર્શે છે. ફિલ્મમાં એ સંવેદનશીલતાથી દર્શાવવામાં આવ્યું છે કે જ્યારે પરિવારનો મુખ્ય મોભી અચાનક ગાયબ થઈ જાય છે ત્યારે પરિવારની શું મનોવ્યથા હોય છે.