ગાંધીધામ તાલુકો

ગાંધીધામ તાલુકો
તાલુકો
દેશ	ભારત
રાજ્ય	ગુજરાત
જિલ્લો	કચ્છ
મુખ્યમથક	ગાંધીધામ
વસ્તી  (૨૦૧૧)
• કુલ	૩૨૭૧૬૬
• લિંગ પ્રમાણ	૮૭૭
• સાક્ષરતા	૭૭.૯૨%
સમય વિસ્તાર	UTC+૫:૩૦ (IST)

ગાંધીધામ તાલુકો ભારત દેશના પશ્ચિમ ભાગમાં આવેલા ગુજરાત રાજ્યના કચ્છ જિલ્લાનો મહત્વનો તાલુકો છે. ગાંધીધામ આ તાલુકાનું મુખ્ય મથક છે. તાલુકા પંચાયતની વહીવટી કચેરી ગાંધીધામ-આદિપુરને જોડતા ટાગોર રોડ પર આદિપુર નજીક આવેલી છે. અંજાર અને ભચાઉ આ તાલુકાથી સૌથી નજીકના તાલુકા છે. આ તાલુકામાં અનેક પ્રકારના ઉદ્યોગોનો વિકાસ થયો છે. જેમાં ટ્રાન્સપોર્ટેશન, શોપિંગ, મીઠાઉદ્યોગ, લાકડાનો મોટો ઉદ્યોગ વગેરે મુખ્ય છે. સ્પેશ્યલ ઇકોનોમિક ઝોનમાં ભારતની નામાંકિત કંપનીઓની ફેક્ટરીઓ અને ઇફ્કોનો ખાતરનો પ્લાન્ટ પણ આ તાલુકામાં છે.

ગાંધીધામ તાલુકામાં જુદી-જુદી ભાષાઓ બોલાય છે, જેમાં કચ્છી, સિંધી, હિંદી અને ગુજરાતી મુખ્ય છે.

ઇતિહાસ

ભારતના ભાગલા થતાં કરાચી બંદર પાકિસ્તાનમાં ગયું અને તેની ખોટ પૂરી કરવા માટે કંડલા બંદરનો ભારત સરકાર દ્વારા વિકાસ કરાયો હતો જે બંદર આ તાલુકામાં આવેલું છે. તેના કારણે આ તાલુકામાં અનેક ઉદ્યોગોનો વિકાસ થયો છે તથા વસતીમાં પણ વધારો થયો છે. જેને ધ્યાને રાખીને ગુજરાત સરકાર દ્વારા ૨૨ ઓગસ્ટ ૨૦૦૦ના રોજ અંજાર તાલુકામાંથી ૯ ગામો તથા કંડલા કોમ્પલેક્ષના શહેરી વિસ્તારને મેળવીને નવા ગાંધીધામ તાલુકાની રચના કરવામાં આવી હતી. આ તાલુકો કચ્છ જિલ્લામાં સૌથી નાનો તાલુકો છે.

જોવાલાયક સ્થળો

• કંડલા બંદર
• ગાંધી સમાધી, આદિપુર.
• ભાઇ પ્રતાપની સમાધિ, ગાંધીધામના સ્થાપક.
• ગાંધીધામની સ્થાપના સમયનું નિર્વાસિતેશ્વર મહાદેવ મંદિર.
• અંતરજાળ ગામે આવેલું તળાવ.

તાલુકાનું ભૌગોલિક સ્થાન અને ગાંધીધામ તાલુકાના ગામ

અંતરજાળ ભારાપર ચુડવા ગળપાદર ગાંધીધામ કિડાણા મીઠી રોહર પડાણા શિણાય