દેવકુંડ ધોધ

દેવકુંડ ધોધ
દેવકુંડ ધોધ, ભીરા, રાયગડ જિલ્લો
દેવકુંડ ધોધ દેવકુંડ ધોધ
સ્થાન	ભીરા, રોહા, રાયગડ, મહારાષ્ટ્ર, ભારત
અક્ષાંસ-રેખાંશ	18°27′36″N 73°23′22″E
પ્રકાર	સીધો કુદકો (પ્લંજ)

દેવકુંડ ધોધ (Devkund Falls) ભારત દેશના મહારાષ્ટ્ર રાજ્યના રાયગડ જિલ્લામાં ભીરા ગામ નજીક સ્થિત એક ધોધ છે. આ ધોધ અંગ્રેજી ભાષામાં 'પ્લંજ' પ્રકારનો ધોધ કહેવાય છે, જેમાં જળધારા મોટા પ્રમાણમાં ખડકાળ સપાટી પર થી સીધી જ નીચે ખાબકે છે. આ એક દિવસીય આનંદવિહાર (પિકનિક) માટેનું લોકપ્રિય સ્થળ છે.

સ્થાન

દેવકુંડ ધોધ ચોખ્ખા પાણીનો અણબોટ્યા સ્થળ પર આવેલ છે. આ ધોધનું વહેણ ત્રણ ઝરણાંઓના સંગમ દ્વારા બને છે અને આ સ્થળને કુંડલિકા નદીનું ઉદ્‌ગમ સ્થાન કહેવાય છે. અહીં પહોંચવા ભીરા ગામથી લગભગ ત્રણ કલાક જેટલું પગપાળા ચઢાણ કરી પહોંચવું પડે છે. આ માર્ગ કુંડલિકા નદી પરના બંધના જળાશયને કિનારે કિનારે ગાઢ જંગલમાંથી પસાર થઈ દેવકુંડ ધોધ ખાતે પહોંચે છે. આ પદ‌આરોહણ માર્ગ મુખ્યત્વે અર્ધ-સૂકા જંગલોમાંથી નદીને સમાંતર તેમ જ વાંકોચૂકો છે. આ સ્થળે જવા માટે માર્ગદર્શક (ગાઇડ) જરૂરી છે કારણ કે ત્યાં ગાઢ જંગલ આસપાસ છે.

અંતર

• પુણે થી અંતર: ૧૧૦ કિ. મી.
• મુંબઇ થી અંતર: ૧૭૦ કિ. મી.
• લોનાવાલા થી અંતર: ૫૨ કિ. મી.

સૌથી નજીકનું હવાઈમથક

• પુણે: ઘરેલુ
• મુંબઈ: આંતરરાષ્ટ્રીય

નજીકનું રેલવે જંકશન

• માનગાંવ રેલવે સ્ટેશન, કોંકણ રેલવે, ૩૦ કિમી દૂર
• લોનાવાલા રેલવે સ્ટેશન, મધ્ય (સેન્ટ્રલ) રેલવે, ૮૨ કિમી દૂર

સ્નાન

દેવકુંડ ધોધ નહાવા માટે સારો છે, ધોધ હેઠળના કુંડમાં સ્નાન માણી શકાય છે. આ સ્થળ હંમેશાં પ્રવાસીઓને આકર્ષે છે.

સલામતી

ચોમાસા દરમિયાન વરસાદ અને પહાડી ઢોળાવને લીધે પાણીનું વહેણ ખૂબ જ વધુ તેમ જ ઝડપથી વહેતું હોવાને કારણે અહીં ધોધ જોવા માટે જવું અસુરક્ષિત છે. વર્ષ ૨૦૧૭માં, ચોમાસા દરમિયાન જુલાઈ થી ત્રણ મહિના માટે અકસ્માતો વધતાં પ્રવાસીઓ માટે દેવકુંડ ધોધ બંધ કરવામાં આવ્યો હતો. આ સ્થળે બે મુલાકાતીઓના અકસ્માત મૃત્યુ પછી, સ્થાનિક વહીવટીતંત્ર દ્વારા અહીં કલમ ૧૪૪ મુજબ નિષેધ ફરમાવવામાં આવેલ છે, જે મુજબ એક સાથે ચાર કરતાં વધુ લોકો આ વિસ્તારમાં સાથે ભેગા થઈ શકતા નથી.