સુમના રોય

સુમના રોય
જન્મ	જલપાઈગુડી, પશ્ચિમ બંગાળ, ભારત
વ્યવસાય	નવલકથાકાર ટૂંકી વાર્તા લેખક કવિ નિબંધકાર
રાષ્ટ્રીયતા	ભારતીય
માતૃ શિક્ષણ સંસ્થા	સિલિગુડી કૉલેજ, ઉત્તરી બંગાળ વિશ્વવિદ્યાલય
નોંધપાત્ર સર્જનો	હાઉ આઇ બીકમ અ ટ્રી (૨૦૧૭) મિસિંગ: અ નોવેલ (૨૦૧૯) આઉટ ઑફ સિલેબસ (૨૦૧૯) માય મધર્સ લવર એન્ડ અધર સ્ટોરીઝ (૨૦૧૯)
વેબસાઇટ
https://sumanaroy.co.in/

સુમના રોય ભારતીય લેખિકા અને કવયિત્રી છે. તેમની કૃતિઓમાં હાઉ આઇ બીકમ અ ટ્રી (૨૦૧૭), મિસિંગ: અ નોવેલ (૨૦૧૯), આઉટ ઑફ સિલેબસ (૨૦૧૯) અને માય મધર્સ લવર એન્ડ અધર સ્ટોરીઝ (૨૦૧૯)નો સમાવેશ થાય છે. તેમની અપ્રકાશિત નવલકથા લવ ઇન ધ ચિકન્સ નેક 'મેન એશિયન લિટરરી પ્રાઇઝ' (૨૦૦૮) માટે લાંબા સમયથી સૂચિબદ્ધ કરવામાં આવી હતી. તેમનું પ્રથમ પુસ્તક 'હાઉ આઇ બીકમ અ ટ્રી' ૨૦૧૭ના શક્તિ ભટ્ટ પુરસ્કાર માટે સૂચિબદ્ધ કરવામાં આવ્યું હતું.

જીવન

સુમના રોય પશ્ચિમ બંગાળના દાર્જિલિંગ જિલ્લાના સિલિગુડી શહેરના વતની છે. તેમણે સિલિગુડીની મહબર્ટ હાઈસ્કૂલ અને કોલકાતાની પ્રેટ મેમોરિયલ સ્કૂલમાં અભ્યાસ કર્યો હતો, બાદમાં તેમણે સિલિગુડી કોલેજ અને ઉત્તરી બંગાળ વિશ્વવિદ્યાલયમાં અંગ્રેજી સાહિત્યનો અભ્યાસ કર્યો હતો. તેમણે પોતાની કારકિર્દીની શરૂઆત પશ્ચિમ બંગાળની સરકારી કોલેજમાં અંગ્રેજી સાહિત્યના અધ્યાપનકાર્યથી કરી હતી. વર્તમાનમાં તેઓ અશોકા યુનિવર્સિટી ખાતે સર્જનાત્મક લેખન અને અંગ્રેજી સાહિત્યના પ્રાધ્યાપક છે. ૨૦૧૮માં રશેલ કાર્સન સેન્ટર ફોર એન્વાયર્નમેન્ટ એન્ડ સોસાયટી, મ્યુનિચમાં કાર્સન ફેલો તરીકે તેમની નિમણૂક કરવામાં આવી હતી.

સર્જન

રોયનું પહેલું સર્જનાત્મક કાર્ય તેમની અપ્રકાશિત નવલકથા લવ ઇન ધ ચિકન્સ નેક હતી. આ નવલકથામાં ત્રણ મિત્રો તિર્ના, નિર્જહર અને બલરામની મિત્રતા વિશેની વાર્તા છે. દાર્જિલિંગ, દોઆર અને સિલિગુડી શહેરો વચ્ચે આકાર લેતી આ કથા ઇતિહાસ, રાજકીય ચળવળો, પૃથક ગોરખાલેન્ડ અને કામતાપુરની માંગ સાથે આગળ વધે છે, જે ત્રણેય મિત્રો વચ્ચેના સંબંધોને અસર કરે છે.

તેમણે ૨૦૧૭માં પોતાનું પહેલું પુસ્તક હાઉ આઇ બીકમ અ ટ્રી પ્રકાશિત કર્યું હતું, જે એક કાલ્પનિક કથા હતી. પ્રથમપુરુષ કથનરીતિના ઉપયોગ સાથેનું આ પુસ્તક વનસ્પતિ જીવનના વિવિધ પાસાઓ રજૂ કરે છે. આ પુસ્તકનું ફ્રેન્ચ અને જર્મન ભાષામાં ભાષાંતર કરવામાં આવ્યું હતું.

તેમનું અન્ય પુસ્તક, મિસિંગ: અ નોવેલ (૨૦૧૯), હિન્દુ મહાકાવ્ય રામાયણનું આધુનિક પુનર્કથન છે. ૨૦૨૧માં ગુવાહાટી ખાતે એક કિશોરીની છેડતીની વાસ્તવિક ઘટના પર આધારિત આ નવલકથા છેડતીનો ભોગ બનેલી કિશોરીની મદદ કરનાર એક સામાજીક કાર્યકર્તા કોબિતાની વાર્તા વર્ણવે છે. આ નવલકથાના વિષયવસ્તુને રામાયણમાં સીતાના ગુમ થવાની અને રામ તેના પાછા ફરવાની રાહ જુએ છે એ ઘટનાક્રમ સાથે સુપેરે સાંકળવામાં આવી છે. કોબિતા સમગ્ર નવલકથામાં ગુમ રહે છે.

મિસિંગ: અ નોવેલ (૨૦૧૯) બાદ રોયે તેમનો પહેલો કવિતા સંગ્રહ આઉટ ઓફ સિલેબસ પ્રકાશિત કર્યો હતો. આ ઉપરાંત માય મધર્સ લવર એન્ડ અધર સ્ટોરીઝ તેમનો ટૂંકી વાર્તાઓનો સંગ્રહ છે જે ૨૦૧૯માં પ્રકાશિત થયો હતો. રોયે એનિમિયા ઇન્ડિકા: ધ ફાઇનેસ્ટ એનિમલ સ્ટોરીઝ ઇન ઇન્ડિયન લિટરેચર (૨૦૧૯)નું સંપાદન કર્યું હતું, જે પ્રાણીઓ પર આધારિત અંગ્રેજીમાં લખાયેલી ૨૧ ટૂંકી વાર્તાઓનો સંગ્રહ છે.

પુરસ્કારો અને નામાંકન

તેમની અપ્રકાશિત નવલકથા લવ ઇન ધ ચિકન્સ નેક 'મેન એશિયન લિટરરી પ્રાઇઝ' (૨૦૦૮) માટે સૂચિબદ્ધ કરવામાં આવી હતી. તેમનું પ્રથમ પુસ્તક 'હાઉ આઇ બીકમ અ ટ્રી' ૨૦૧૭ના શક્તિ ભટ્ટ પુરસ્કાર માટે તથા વર્ષ ૨૦૧૯-૨૦ના સાહિત્ય અકાદમી પુરસ્કાર માટે પણ સૂચિબદ્ધ કરવામાં આવ્યું હતું.

બાહ્ય કડીઓ

• અધિકૃત વેબસાઈટ સંગ્રહિત ૨૦૨૦-૧૨-૨૦ ના રોજ વેબેક મશિન