ઈદડાં

ઈદડાં એટલે સફેદ ઢોકળાં. આ ઢોકળાં ચોખા અને અડદની દાળમાંથી બનાવવામાં આવે છે.આ એક બાફેલું ફરસાણ છે. ખાવામાં સ્વાદિષ્ટ અને પચવામાં હલકાં હોય છે. આ ઢોકળાં બનાવવામાં ઘણી પૂર્વ તૈયારીની જરૂર પડે છે.

કૃતિ

ત્રણ ભાગ ચોખા અને એક ભાગ અડદની દાળ લઈ તેનો કરકરો લોટ દળાવો. (ઝીણાં રવા જેવો)
આ લોટમાં હિંગ, મીઠું, ખારો (ચપટી) અને મોણ નાખો.
આ લોટમાં ખાટી છાશ(જાડી)ઉમેરી મધ્યમ ખીરું બનાવો.
ખીરાને ખૂબ હલાવી ને હળવું બનાવો.
તેને હૂંફાળી જગ્યામાં ઢાંકીને મૂકો અને ૭-૧૦ કલાક આથો લાવવા મૂકો.
ભાવેતો આ ખીરામાં આદુ મરચાં વાટીને નાખો ફરી ખીરાને હલાવો.
થાળીમાં તેલ ચોપડી તેમાં ખીરાને ભાવતી જાડાઈમાં પાથરો.
આની ઉપર લાલ મરચું અથવા મરીનો ભૂકો ભભરાવો.
આ થાળીને વરાળમાં બાફવા મૂકો.
સીજી જાય એટલે તેને કાઢી ચાકુથી ચોરસ કાપો.

નોંધ

આને વઘારીને ખરા કરી ખાતા સ્વાદીષ્ટ લાગે છે.
ગરમા ગરમ ઢોકળાં કાચા તેલ સાથે ખાઈ શકાય છે.
ઢોકળાં કોપરાની ચટણી સાથે કે કોથમીરની ચટણી સાથે આરોગી શકાય છે.
લોટ પલાળતી વખતે તેમાં મેથીના દાણા પણ નાખી શકાય છે.