તેરા કિલ્લો

તેરા કિલ્લો ગુજરાતના કચ્છ જિલ્લામાં આવેલો એક કિલ્લો છે. તે કચ્છના અબડાસા તાલુકાના તેરા ગામ નજીક આવેલો છે.

સ્થાન

તેરા કિલ્લો ભુજથી ૮૫ કિમીના અંતરે પશ્ચિમે આવેલો છે. તે ત્રિતેરા એટલે કે ત્રણ તળાવો ચત્તાસર, છત્તાસર અને સુમરાસરના કિનારાઓ પર આવેલો છે.

ઇતિહાસ

દેશળજી પ્રથમ (૧૭૧૮ - ૧૭૪૧‌)ના શાસન દરમિયાન તેરાની જાગીર સોંપાતા આ કિલ્લો જાડેજાઓ શાસકો દ્વારા બાંધવામાં આવ્યો હતો.

મહારાવ લખપતજીના શાસન (૧૭૪૧-૧૭૬૦) દરમિયાન યુદ્ધમાં કિલ્લો ભારે નુકશાન પામ્યો હતો. તેરા જાગીરના સુમરાજી ઠાકોરે કચ્છના રાવ સાથે ખરાબ ભાષામાં વાત કરતા લખપતજીએ તેરામાં સેના મોકલી હતી. કચ્છના ઇતિહાસમાં પ્રથમ વખત યુદ્ધમાં તોપો વપરાઇ હતી. તોપગોળા વડે મોટાભાગનો કિલ્લો નાશ પામ્યો હતો. ત્રણ મહિનાની ઘેરાબંધી પછી સુમરાજીએ માફી માંગીને શરણાગતિ સ્વીકારી હતી.

૧૮૧૯ના ધરતીકંપમાં આ કિલ્લો નુકશાન પામ્યો હતો અને પછીથી તેનું સમારકામ કરવામાં આવ્યું હતું.

આ કિલ્લો હવે કચ્છનું એક પ્રવાસી આકર્ષણ છે.