માણેક ચોક

માણેક ચોકની સવાર

માણેક ચોક એ અમદાવાદનો જૂનો શહેરી વિસ્તાર છે. તે ઐતહાસિક ઇમારતોથી ઘેરાયેલો છે. સવારમાં તે શાકભાજીની બજાર, બપોરે નાણાં બજાર અને રાત્રે ખાણીપીણી બજાર બની જાય છે.

નામ

માણેક ચોકનું નામ સંત માણેકનાથ પરથી પડ્યું છે જેમણે અહમદશાહને ૧૪૧૧માં ભદ્રનો કિલ્લો બાંધતા અટકાવેલો અને પછીથી મદદ કરેલી.

માણેક ચોક

આ ચોક સવાર દરમિયાન શાકભાજી બજાર તરીકે ઉપયોગમાં લેવાય છે જ્યારે બપોર દરમિયાન ઘરેણાં બજાર હોય છે, જે ભારતમાં બીજા ક્રમનું સૌથી મોટું બજાર છે, જ્યાં દિવસ દરમિયાન ૩૦ લાખ રૂપિયાનો ધંધો થાય છે. જોકે માણકે ચોક રાત્રિના ૯.૩૦ પછી ત્યાં ભરાતા ખાણીપીણી બજાર માટે લોકપ્રિય છે, જે મધ્ય રાત્રિ સુધી ખૂલ્લું રહે છે.

સ્થાપત્યો

માણેકચોક નજીક વેચાતો મુખવાસ

નજીકમાં કેટલાંક ઐતહાસિક સ્થાપત્યો આવેલા છે.

બાબા માણેકનાથ મંદિર

માણેક ચોકમાં સંત માણેકનાથની સમાધિના સ્થળે મંદિર આવેલું છે.

બાદશાહનો હજીરો

અહીં બાદશાહી શાસન દરમિયાન પુરુષ સભ્યોને દફન કરવામાં આવતા હતા. અમદાવાદના સ્થાપક અહમદશાહની કબર અહીં આવેલી છે. અહીં સ્ત્રીઓને પ્રવેશ આપવામાં આવતો નથી અને પુરુષોએ અહીં દાખલ થતા પહેલાં માથા પર કોઇ વસ્ત્ર પહેરવું ફરજિયાત છે. માર્ગની બીજી બાજુએ કેટલાંક મંત્રીઓની કબર પણ આવેલી છે.જે માણેક ચોકની જમણી બાજુએ આવેલી છે.

રાણીનો હજીરો

અહમદશાહની રાણીની કબર (૧૮૬૬)

રાણીનો હજીરો (અથવા રાણીની કબર), જ્યાં રાજવી કુળના સ્ત્રી સભ્યોને દફન કરવામાં આવતા હતા એ હવે સ્ત્રીઓનાં પોશાક, ઘરેણાં અને અન્ય વસ્તુઓનું બજાર છે. ગરબાના પરંપરાગત વસ્ત્રો અહીં મળે છે. ઘણાં પ્રકારના મુખવાસની દુકાનો અહીં આવેલી છે. રાણીનો હજીરો માણેક ચોકથી પૂર્વ દિશાએ આવેલો છે.

અમદાવાદ શેરબજાર ઇમારત

અમદાવાદ શેરબજારની ઇમારત

અમદાવાદ શેરબજારની સ્થાપના ૧૮૯૪માં થઇ હતી. મુંબઇના (બોમ્બે સ્ટોક એક્સચેન્જ) શેરબજાર પછી તે ભારતમાં સૌથી જૂનું શેરબજાર છે. અહીં શેરબજારનું કામકાજ ૧૯૯૬ સુધી ચાલતું હતું. આ ઇમારત ૯૩ વર્ષ જૂનાં અંગ્રેજી સ્થાપત્યનો એક ઉત્તમ નમૂનો છે.

મૂહર્ત પોળ

મૂહર્ત પોળ એ અમદાવાદની પ્રથમ પોળ હતી. જૈનો અહીં ૧૪૫૦ની આસપાસ સ્થાયી થયા હતા. પોળની અંદર શીતલનાથ જૈન દેરાસર અને ધોળેશ્વર મહાદેવ મંદિર એમ બે મંદિરો આવેલા છે.

આ પણ જુઓ

• અમદાવાદ
• ભદ્રનો કિલ્લો
• અમદાવાદના દરવાજા

બાહ્ય કડીઓ

• ગુજરાત ટુરિઝમ સંગ્રહિત ૨૦૧૭-૦૨-૦૮ ના રોજ વેબેક મશિન